Pavlodar oblysynda Jeńis kúni qarsańynda maıdangerlerge 150 myń teńgeden beriledi
Bul týraly oblystyq jumyspen qamtýdy úılestirý jáne áleýmettik baǵdarlamalar basqarmasy ardagerlermen jáne múgedektermen jumys jasaý bóliminiń basshysy Tursyn Manasbaeva málim etti, dep habarlaıdy pavlodarnews.kz.
«Pavlodar oblysynda 146 soǵys ardageri bar. Olardyń arasyndaǵy eń úlkeni - Ǵabdýlla Beısenbaev. Bıyl 99 jasqa keldi. Pavlodar qalasynda turady. Sonymen qatar Uly Otan soǵysynyń ardagerimen teńestirilgen azamattardyń sany 2074 bolsa, tyl ardagerleriniń sany 8309 adamdy quraıdy. Bıylǵy Jeńis kúni merekesi qarsańynda qan maıdanda Otanyn qorǵap, erlik jasaǵan barlyq ardagerdiń úıine baryp, jaǵdaılarymen tanysyp shyǵamyz. Kıim-keshek, azyq-túlik jáne basqa da kerekti zattarmen syılyq jasaımyz», - deıdi Tursyn Manasbaeva. Jeńis kúni merekesi qarsańynda Uly Otan soǵysy ardagerlerimen teńestirilgen azamattar men tyl ardagerleri de qarjylaı kómekten shet qalmaıdy. Alǵashqylaryna 22690 teńge kóleminde, sońǵylaryna 11345 teńge kóleminde bir rettik járdemaqy tólenedi.
Aıta keteıik, soǵys ardagerleri barlyq áleýmettik tólemnen bosatylǵan. Sonymen qatar, qajetti dári-dármek tegin berilip, medıtsınalyq qyzmet tegin kórsetiledi. Jyl basynan beri Pavlodar qalasynda úsh soǵys ardageriniń ótinishi boıynsha baspanalaryna jóndeý jumystary júrgizilgen.
