Pavlodar oblysynda jedel járdem feldsheri koronavırýs juqtyrdy
PAVLODAR. QazAqparat - Pavlodar oblysynda medıtsına qyzmetkeri koronavırýs ınfektsııasyn juqtyrdy, dep habarlaıdy QazAqparat.
Buǵan deıin habarlaǵanymyzdaı, 10 sáýir saǵat 20.15-tegi jaǵdaı boıynsha, Qazaqstanda koronavırýs indetine shaldyqqan taǵy 6 adam anyqtaldy. Onyń ishinde Pavlodar oblysynda – 1 adam.
Pavlodar oblystyq Taýarlar men kórsetiletin qyzmetterdiń sapasy men qaýipsizdigin baqylaý departamentiniń málimetine sáıkes, ınfektsııany juqtyrǵan azamat 24 jasta. Ol oblys ortalyǵynda jedel járdem stantsııasynyń feldsheri bolyp jumys isteıdi.
«Ol koronavırýs ınfektsııasynan qaza bolǵan adammen baılanys jasaǵan. Naýqastyń jaǵdaıy qanaǵattanarlyq, temperatýra men shaǵymdary joq. Onymen baılanysta bolǵan 88 tulǵa anyqtaldy. Barlyǵy oqshaýlandyryldy», - delingen aqparatta.
Sońǵy málimet boıynsha, Pavlodar oblysynda koronavırýs jalpy 4 adamnan anyqtaldy. Barlyq óńirdegi naýqastar sany - 808.
