Pavlodar oblysynda Jedel áreket etý ortalyǵy quryldy
Jedel áreket etý ortalyǵyna (JÁEO) 130 nómiri boıynsha qońyraý shalýǵa bolady, ýaqytsha bul nómirge tek statsıonarly telefon arqyly habarlasýǵa múmkindik bar. Sonymen qatar, uıaly telefonnan 109 biryńǵaı baılanys ortalyǵyna túsken ótinishter jedel áreket ortalyǵyna jiberiledi.
JÁEO aımaqta karantın rejıminiń engizilýine baılanysty turǵyndardyń suraqtaryna jedel jaýap berý maqsatynda quryldy. Pavlodar oblysy ákiminiń orynbasary Sáken Shaıahmetovtiń aıtýynsha, jedel áreket etý ortalyǵyna túsken suraqtarǵa bir saǵat ishinde jaýap beriledi.
– JÁEO -da barlyq oblystyq basqarma basshylarynyń orynbasarlarynan qurylǵan 80-nen astam qyzmetker shoǵyrlanǵan,- dep habarlady oblys ákiminiń orynbasary jýrnalıstermen ótkizgen tikeleı konferentsııa barysynda. – Biz kásipkerlik, aýyl sharýashylyǵy, turǵyn úı-kommýnaldyq sharýashylyǵy, áleýmettik qorǵaý sııaqty basty baǵyttar boıynsha jumys jasaımyz. Qazir barlyq ótinimder 109 biryńǵaı baılanys ortalyǵy arqyly qabyldanyp jatyr, onda operatorlar sanyn kóbeıttik. Eger de sheshimi qıyn suraqtar bolsa, olar tez arada Jedel áreket etý ortalyǵyna jiberiledi.
Qazirgi ýaqytta 130 nómirine tek stantsıonarly telefon arqyly qońyraý shalýǵa bolady, biraq jýyq arada uıaly telefonmen habarlasýǵa da múmkindik jasalady. JÁEO turǵyndardy tolǵandyrǵan basty suraqtardy sheshý úshin táýlik boıy jumys isteıdi.