Pavlodar oblysynda jas kásipkerlerdi qoldaýǵa arnalǵan baǵdarlama iske qosyldy

Oblys ákimdigi baspasóz qyzmetiniń Telegram praqshasynyń málimetinshe, jańa jobanyń iske qosylǵany týraly shaǵyn jáne orta bıznesti qoldaý máseleleri jónindegi keńes barysynda jarııalanǵan.

Jumys kezdesýin ashqan Pavlodar oblysynyń ákimi «Araı» saýda úıindegi órt kezinde múlki zardap shekken jalǵa alýshylarǵa barynsha qoldaý kórsetýdi talap etti. Órt 11 qazannan 12 qazanǵa qaraǵan túni oryn alyp, 1,5 myń sharshy metrge jýyq saýda alańyn joıǵan bolatyn.

- Pavlodar qalasynyń ákimine kásipkerlik jáne saýda basqarmasymen birlesip, keltirilgen zalaldyń mólsherin baǵalaýdy jáne zardap shekken kásipkerlerge járdem kórsetý jóninde sharalar qabyldaýdy tapsyramyn, - dedi Ábilqaıyr Sqaqov. - Bul máseleni erekshe baqylaýǵa alý kerek.

Shaǵyn jáne orta bıznesti qoldaý sharalaryn iske asyrý týraly baıandaǵan kásipkerlik jáne saýda basqarmasy basshysynyń orynbasary Medet Shoqanov bastaýyn naqty bizdiń óńirden alǵan jas kásipkerlerge kómek kórsetý jónindegi jańa baǵdarlamanyń iske qosylýy týraly aıtyp berdi.

Pavlodar oblysynyń ákimdigi men Halyk Bank birlesken jobasy «Zhas-Halyk. Ertis» degen ataýǵa ıe boldy. Onyń maqsatty aýdıtorııasy – jeti jylǵa deıin jyldyq 5% mólsherlememen 15 mıllıon teńgege deıin kepilsiz kredıt alýǵa úmitti 30 jasqa deıingi kásipkerler.

- Nesıe alýǵa ótinim berý úshin áleýetti qatysýshylar 26 qazanǵa deıin zhashalyk.kz portalynda ótinish berýi qajet, - dedi Medet Shoqanov. - 1-2 qarashada bizdiń basqarma quramyndaǵy komıssııa, «Halyq Banki» men «Atameken» palatasynyń óńirlik fılıaldarynyń jáne «Damý» qorynyń ókilderi málimdelgen pýldy qarap, qarjylandyrý týraly sheshim qabyldaıdy. Usynylatyn ótinimder sany boıynsha lımıt belgileýdi usynamyz: Pavlodar úshin - 50 ótinim, Ekibastuz úshin - 30, Aqsý úshin - 20, al aýdandar úshin-5 ótinimnen.

Jeńildikti nesıe qyzyqty jańa bıznes-ıdeıa usynatyn jáne ony negizdeı alatyn kásipkerlerge beriledi.

- Berilgen nesıelerdiń tıimdiligin qadaǵalaý mańyzdy,-dep tapsyrmany aıqyndady Pavlodar oblysynyń ákimi. - Baǵdarlamany iske asyrý úshin kózdelgen qarjylandyrýdyń jańa jobany bastaýǵa nemese jumys istep turǵan bıznesti qoldaý úshin maqsatty paıdalanylýyn baqylaý qajet. Óńirde shaǵyn jáne orta bıznesti qoldaý úshin shaǵyn ındýstrııalyq aımaqtar (ShIA) qurý qajet. Olardyń máni kásipkerler óndiristik úı-jaılardy jalǵa aqysyz paıdalanýǵa alatynynda.

Búginde oblysta osyndaı toǵyz aımaq jumys isteıdi. Taǵy tórt shaǵyn ındýstrııalyq aımaq - Pavlodar, Ýspen, Aqtoǵaı jáne Pavlodar aýdandarynda osy jyldyń sońyna deıin iske qosylmaq.

Óńir basshysy shaǵyn jáne orta bıznes sýbektileriniń ashylýyn keshiktirmeýdi tapsyrdy. Nátıjesinde olar 75 bıznes-jobany nemese 100-den astam jańa jumys ornyn qamtýy tıis.

- Aýdan ortalyqtarynda da, aýyldarda da bos úı-jaılar bar - olardy durys paıdalaný qajet, - dep atap ótti Ábilqaıyr Sqaqov. - Bıznesmendermen, isin jańa bastap otyrǵan kásipkerlermen barlyq máselelerdi jergilikti jerlerde pysyqtap, shaǵyn ındýstrııalyq aımaqtardy iske qosyńyzdar.

Sondaı-aq óńirde shaǵyn qarjy uıymdaryn qurýmen aınalysýda. Esterińizge sala keteıik, bıznes-qaýymdastyq óńir basshysymen jaqynda ótken kezdesý kezinde mundaı uıymdardyń qajet ekenin aıtqan bolatyn.

Sonymen qatar Medet Shoqanov «Bıznestiń jol kartasy» (BJK), «Qarapaıym zattar ekonomıkasy» jáne «Eńbek» memlekettik baǵdarlamalaryn iske asyrý barysy týraly habarlady.

Bıyl BJK aıasynda memlekettik granttarǵa qosymsha qarajat bólindi. Búginde úsh baǵdarlama boıynsha 36 mlrd teńgege 500-den astam joba qoldaý tapty. Bul ótken jyldyń kórsetkishinen úsh ese artyq.

Ábilqaıyr Sqaqov shaǵyn jáne orta bıznesti qoldaý máselelerinde ýaqyt ozdyrýǵa bolmaıtynyn atap ótti.

Búgingi tańda ShOB salasynda óńirdiń 130 myńnan astam turǵyny jumys isteıdi jáne ákimdik pen basqa da taraptar kásipkerlermen ózara tabysty is-qımyl jasaǵan jaǵdaıda bul san aıtarlyqtaı artýy múmkin, dep túıindedi óńir basshysy.