Pavlodar oblysynda janar-jaǵarmaı tıegen kólik apatqa ushyrady
PAVLODAR. QazAqparat - Nur-Sultan qalasynan Shyǵys Qazaqstan oblysyna baǵyt alǵan, 38000 lıtr dızel otyny quıylǵan benzovoz tsısternasymen joldyń shetine aýdarylyp ketti, dep habarlaıdy QazAqparat Pavlodarnews.kz-ke silteme jasap.
Pavlodar oblysy tótenshe jaǵdaılar departamentiniń baspasóz qyzmetiniń málimdeýinshe, keshe6 ıaǵnı 15 qarasha kúni saǵat 22:08-de «101» pýltine Qyzylorda-Pavlodar tas jolynda jol-kólik oqıǵasy oryn alǵany týraly habar kelip túsken.
- Aqsý aýdany Bereke aýylynyń mańynda tsısternasy bar Aqmola óńiriniń «Mercedes-Benz Actros» avtokóligi jolda iri qara maldy qaǵyp ketken. Oqys oqıǵa saldarynan Nur-Sultan qalasynan ShQO-na 38000 lıtr dızel otynyn apara jatqan benzovoz tsısternasymen joldyń shetine aýdarylǵan. 150 sharshy metr alańǵa dızel otyny tógildi. Júrgizýshi zardap shekken joq, - deıdi Qalqaman kentiniń azamattyq qorǵaý kapıtany, 13 órt sóndirý beketiniń bastyǵy Baqberdi Qaǵabaev.
1982 jyly týǵan júrgizýshi alapat jarylystyń aldyn alǵan. Ol dereý motordy sóndirip, kóligin akkýmýlıatordan ajyratyp úlgergen.
- Oqys oqıǵa ornyna Qalqaman kentiniń órt sóndirý beketiniń 3 adam jáne 1 tehnıkasy jumyldyryldy. Olar tógilgen janar-jaǵarmaıǵa arnaıy kóbik shashyp, sol arqyly dızeldiń odan ári tógilýin joıyp, benzovozdyń jarylysynyń aldyn aldy. Júrgizýshi men órt sóndirýshilerdiń jedel jáne úılesimdi áreketteri tas joldaǵy tótenshe jaǵdaıdyń aldyn aldy, - dedi Baqberdi Qaǵabaev.
Oqıǵa ornyna Pavlodar oblysy TJD jeke quramynyń 8 adamy, «102» qyzmeti shyqty. Sondaı-aq Qalqaman, Lenın kentteri men Aqsý, Ekibastuz qalalarynan qalǵan otyndy tartyp shyǵarý jáne tsısternany kóterý úshin 6 tehnıka jumyldyryldy.
