Pavlodar oblysynda jańa alty sút-taýar fermasy ashylady
PAVLODAR. QazAqparat - Pavlodar oblysynda jańadan ashylatyn alty sút-taýar fermasy sút óńdeý kásiporyndaryna shıkizat jetkizýdi jandandyra túsedi, dep habarlaıdy «QazAqparat» HAA tilshisi.
Kásipkerler men jergilikti bıliktiń sút ónimderi salasyn damytý jónindegi josparlary jaıynda Pavlodar aýdanyna jumys saparymen barǵan oblys ákimi Bolat Baqaýov aıtty.
«Pavlodar oblysynda jyl sońyna deıin jańa tehnologııalar negizinde salynǵan alty sút-taýar fermasyn iske qosamyz. Qazir oblystaǵy sút zaýyttary 80% shıkizatpen qamtylǵan, al jańa fermalar olardy sútpen tolyq qamtamasyz etý múmkindigin beredi. Qazir mamandarymyz agrarlyq komıssııamen keńesip, egjeı-tegjeıli zerttep jatyr», - deıdi oblys ákimi. 
Bolat Baqaýov Pavlodar aýdanynyń Lýgansk jáne Rozovka aýyldarynda salynyp jatqan eki sút-taýar fermasyna bardy. 250 mıllıon teńge qarjy quıylǵan «Lýgansk» kooperatıvindegi fermanyń qurylysy 80%-ke aıaqtalǵan, al «Kırov» JShS jobasyna 816 mıllıon teńge bólingen, fermanyń qurylysy 90 protsentke oryndalǵan.
Pavlodar oblystyq ákimdigi baspasóz qyzmetiniń habaryna qaraǵanda, fermanyń ekeýi de jyl sońyna deıin paıdalanýǵa beriledi.
