Pavlodar oblysynda jabdyqtalǵan jaǵajaılar jetispeıdi
PAVLODAR. QazAqparat - Pavlodar oblysynda jaǵajaıda shomylý úshin jabdyqtalǵan oryndar jetispeıdi, bul sýdaǵy qaıǵyly jaǵdaılardyń aldyn alýǵa qıyndyq týǵyzady, dep habarlaıdy QazAqparat tilshisi.
«Bizdiń qyzmetkerlerimiz jaǵajaıdy aralap, adamdarǵa nusqaýlyq berip, «bul jerde shomylýǵa bolmaıtynyn» túsindirip jatyr. Barlyǵy túsingenderin aıtqanymen, kelesi kúni taǵy da sol jerde otyrady», - deıdi Pavlodar oblystyq tótenshe jaǵdaılar departamenti jedel-qutqarý jasaǵy bastyǵynyń orynbasary Serik Sherııazdanov.
Onyń aıtýynsha, shomylý maýsymy bastalǵaly beri óńirde 12 adam, sonyń ishinde jeti bala sýǵa aǵyp ketken. Jaqynda ǵana Ertis aýdanyndaǵy ózennen sýǵa batyp ketken 55 jastaǵy er adamnyń denesi shyǵaryldy.
«Onyń basty sebebi (shomylýǵa tyıym salynǵan jerlerde shomylý - QazAqparat) - jaǵajaılar az. Oblys boıynsha bizde - 192 kól, jeti shaǵyn ózen men bir iri sý arterııasy - Ertis ózeni bar. Barlyq eldi mekenderdiń turǵyndary Ertis jaǵalaýynda shomylady. Oblysta 32 jaǵajaı ashý josparlanyp otyr. Qazirgi tańda resmı túrde 26-sy ashyldy», - dedi Serik Sherııazdanov.
Pavlodar oblysynda kún saıyn 26 jaǵajaıda 99 arnaıy qutqarýshylar kezekshilik etýde. Budan bólek, shomylatyn jerlerdi oblystyq TJD jedel-qutqarý jasaǵynyń qyzmetkerleri patrýldep jatyr.
