Pavlodar oblysynda zańsyz satylatyn pırotehnıkalyq zattar tárkilenýde

Polıtseıler áleýmettik jelilerdegi pırotehnıkalyq zattardy satýǵa arnalǵan habarlamalarǵa monıtorıng jasaýda.
Oblystyq polıtsııa departamentiniń málimdeýinshe, Ekibastuzda páterde zańsyz pırotehnıkalyq zattar satý faktisi anyqtalǵan.
- Áleýmettik jelilerdi baqylaý kezinde Instagramdaǵy akkaýnttardyń birinde atalǵan zattardy satý jónindegi jazba polıtseılerdiń nazaryn aýdardy. Habarlamadaǵy nómir arqyly baılanysqanda satýshy 24 jastaǵy er adam bolyp shyqty, - dedi PD basshysynyń birinshi orynbasary Jasqaırat Qaıyrov.

Pırotehnıkalyq zattardy zańsyz satqany úshin er adamǵa qatysty QRÁQBK 196 baby boıynsha ákimshilik óndirý taǵaıyndalyp, 25 AEK mólsherinde aıyppul salyndy.
Dál osyndaı quqyq buzýshylyq Pavlodar qalasy men Pavlodar aýdanynda da tirkeldi. Ereje buzýshylar ákimshilik jaýapkershilikke tartyldy.

Polıtsııa departamenti pırotehnıkalardy satý tek qaýipsizdik sharalarynyń barlyǵy saqtalǵan, ruqsat qujattary bar arnaıy dúkenderde ruqsat etilgenin eskertedi. Jańa jyl qarsańyndaǵy kúnderde bazarlar men dúkenderge ártúrli pırotehnıkalyq zattar túsedi. Otty-shýly áserleri bar kartondy tsılındrler oıynshyq emes. Birinshi atylýy men jarylýy adamdy soqyr jáne sańyraý qylýy múmkin. Bundaı feıerverkter keıbireýler úshin jaqsylyqpen aıaqtalǵan joq.
- Pırotehnıkalardy qoldaný kezinde qaýipsizdik erejelerin saqtaý qajet. Aldymen jaramdylyq ýaqytyna nazar aýdarǵan jón. Qaýiptilik deńgeıi ekinshiden aspaýy tıis. Pırotehnıkany paıdalanar kezde qoldaný erejesimen muqııat tanysyńyz. Eger raketa janbaı qalsa, qaıta tutatpaý kerek. Adamdardyń qasynda jáne ǵımarat ishinde turýǵa bolmaıdy. Ótip bara jatqan adamdar, janýarlar, qurylystar, orman, qurǵaq zattar mańyna laqtyrýǵa bolmaıdy, - dedi departamentte.

Aıta keteıik, «Pırotehnıka» jedel-aldyn alý sharalary 2021 jyldyń 7 qańtaryna deıin jalǵasady.