Pavlodar oblysynda zańsyz paıdalanǵan 123 myń gektar jer memleketke qaıtaryldy
ASTANA. QazAqparat - Pavlodar oblysynyń prokýrorlary bir jyldan az ýaqyt ishinde zańnamany buzýshylyqpen paıdalanylatyn jalpy aýdany 380 myń ga astam 1 200 jer telimin anyqtady.
Memleketke 123 myń ga jer qaıtarylyp, 36 myń ga jer qaıta aınalymǵa tústi, dep habarlaıdy pavlodarnews.kz .
Oblystyq prokýratýranyń habarlaýynsha, ónerkásiptik bolyp sanalatyn óńirimizde agrosektor damýda. Jer qatynastary basqarmasynyń málimetteri boıynsha Pavlodar oblysynyń jalpy jer aýdany 12,5 mln ga bolady. Bul aýmaqtyń 90 paıyzyn aýyl sharýashylyǵy jerleri: egistikter, shabyndyqtar, jaıylymdar alyp jatyr. Oblys halqynyń 30 paıyzy osy aýdandarda turatynyn aıtyp ótken jón. Biraq sońǵy 10 jyl ishinde aýyl turǵyndarynyń sany 255 myńnan 224 myń adamǵa azaıdy. Oblys prokýrory Serik Qaramanov 2016 jylǵy shilde aıynda áriptesteriniń nazaryn osy máselege burǵan bolatyn. - Ótken jyldyń ekinshi jartyjyldyǵynda prokýratýra qyzmetkerleri - jergilikti atqarý organdarymen birlesip zańnamany buzýshylyqpen paıdalanylatyn 815 jer telimin anyqtady, olardyń jalpy aýdany 225 myń gektardan asyp tústi. 84 myń gektar jer memleketke qaıtaryldy, 16 myń gektar jer telimi qaıta aınalymǵa tústi, - dep qorytyndy jasady Serik Qaramanov. - Osy jyldyń 5 aıynda 409 jer telimi anyqtaldy (eki ese azaıdy, alaıda áli de bolsa bar), bul shamamen 105 myń gektardy quraıdy. Memleketke 38,8 myń gektar jer qaıtaryldy, 20 myńdaıy qaıta aınalymǵa tústi. Ýspen aýdanynda prokýratýra usynymdaryn qaraý nátıjesi boıynsha memleket menshigine «Dılnaz» sharýa qojalyǵynyń 358 ga egistik jeri (paıdalanylmaǵan jer) qaıtaryldy, konkýrs qorytyndysy boıynsha ol jer «Mansur» fermerlik qojalyǵyna berildi. Ótken jyly Ýspen aýdanynda «Dvın» qojalyǵyna (bul ShQ ıesi basqa eldiń azamaty) zańsyz berilgen 900 ga egistik prokýratýranyń júrgizgen jumysynyń arqasynda memleketke qaıtaryldy, al aǵymdaǵy jyldyń mamyr aıynda bul jer ashyq konkýrs nátıjesi boıynsha basqa paıdalanýshyǵa berildi. «Belotserkovskıı» JShS-na bekitilgen bir jarym myń ga egistik jáne 1,8 myń ga basqa da aýyl sharýashylyq jerleri uzaq ýaqyt boıy paıdalanylmaǵan. Endi bul qunarly jerlerdi «BIK» sharýa qojalyǵy basqaryp otyr. Pavlodar oblysy Jer qatynastary basqarmasynyń basshysy Rýslan Daýtbaevtyń málimeti boıynsha jaýapsyz jer paıdalanýshylarǵa qoldanylatyn tıimdi sharalardyń biri - aýyl sharýashylyǵy maqsatyndaǵy paıdalanylmaıtyn jerge salyqty on ese kóterý. 2017 jylǵy 5 mamyrdaǵy jaǵdaı boıynsha 54 jer paıdalanýshy kóterilgen mólsherlememen jalpy somasy 4,4 mln teńge salyq tólegen, bundaı jazaǵa 179 jer paıdalanýshy tartyldy - qazynaǵa 18 mln teńge tústi. Nátıjesinde jer ıeleri 21 myń ga jerden óz erkimen bas tartty. Prokýratýranyń usynymy boıynsha aımaǵymyzda jerdi baqylaý úshin Jerdi qashyqtan barlap qaraýdyń ǵaryshtyq júıesi paıdalanyla bastady. Mundaı qyzmetti «Qazaqstan Ǵarysh Sapary» Ulttyq kompanııasy» AQ usynyp otyr. Máselen, Jelezın aýdanynda aýyl sharýashylyǵy jerlerin naqty kartalaýǵa 3,1 mln teńge qarastyryldy. Pavlodar bılik oryndary jerlerdi, ınjenerlik jelilerdi, sý qorǵaý aımaqtaryn túgendeý jáne qala qurylysy qujattamalaryn salystyrý úshin oblys ortalyǵy aýmaǵyn sýretke túsirýge 16,5 mln teńge jiberedi. Ekibastuz ákimdigi jerdi túgendeý jáne jer telimderin ózdiginen basyp alý jaǵdaılaryn anyqtaý maqsatynda shart aıasynda 11 mln teńgege zamanaýı tehnologııalardy paıdalanady. Rýslan Daýtbaev habarlaǵandaı, Aýyl sharýashylyǵy mınıstrligi Jer resýrstaryn basqarý komıtetiniń 2016 jylǵy analıtıkalyq esepteriniń málimetteri boıynsha Pavlodar oblysy elimizdiń óńirleri ishinde salyq túsimderi boıynsha (18 mlrd teńge) 3 orynda jáne jalǵa berý tólemderi boıynsha 2 orynda (2,3 mlrd teńge) tur. Osy jyldyń 3 aıynda ǵana bıýdjetke jer paıdalanýshylardan 1,14 mlrd teńge tústi.
