Pavlodar oblysynda zańsyz kazıno ashqandar 2,6 mlrd. teńge tabys tapqan

ASTANA. QazAqparat - QR Qarjy mınıstrligi Memlekettik kirister komıteti ótken jyly 22 zańsyz kazınony anyqtady. Budan bólek, 122 elektrondy kazıno men 133 oıyn avtomattary bolǵan zaldar jabyldy, dep xabarlaıdy QazAqparat tilshisi.

«Bıyl biz osy ispetti kásiptiń taǵy bir kózin anyqtadyq. Pavlodar oblysynda eki adam ustaldy. Olar toǵyz adamnyń kómegimen úsh jerde zańsyz onlaın kazıno ashqan. Atalǵan top úsh jyl boıy jumys istedi. Budan olardyń asa saq bolǵandaryn anyq baıqaýǵa bolady. Sol úsh jyldyń ishinde olar 2 mıllıard 600 mıllıon teńgeden astam tabys tapty. Sonyń 392 mıllıard teńgesi salyq retinde tólenbeı qaldy», - dedi komıtettiń úılestirý jáne damý departmenti dırektorynyń mindetin atqarýshy Jambyl Suraǵanov Astanada ótken baspasóz máslıxatynda.

Onyń aıtýynsha, uıymdasqan qylmystyq top kazınodan tapqan aqshany resmı túrde bıznes ashý arqyly zańdastyryp otyrǵan. Máselen, avtokeshender men sulýlyq salondaryn ashty. Onymen qoımaı, biraz qarjyny shetelge shyǵaryp úlgergen.