Pavlodar oblysynda úıir jylqyny urlaǵan barymtashylar ustaldy

ASTANA. QazAqparat - Pavlodar oblysynyń Maı aýdanynyń turǵyny polıtsııaǵa jaıylymnan belgisiz bireýlerdiń 30 jylqysyn aıdap áketkenin habarlaǵan. Tártip saqshylary kúdiktilerdiń izine túsip, 17 jáne 55 jastaǵy Shyǵys Qazaqstan oblysynyń turǵyndaryn qolǵa túsirdi, dep habarlaıdy «QazAqparat» HAA tilshisi.

Ustalǵan kúdiktiler buryn da osyǵan uqsas qylmystary úshin sottalǵan. 55 jastaǵy kúdikti jumys istegen Maı aýdanynyń basqa shetiniń jaıylymyndaǵy qudyqtan 20 jylqynyń jilinshigi tabylǵan. Ieleri tabylǵan aıǵaq arqyly óz jylqylaryn tanyǵan. Tergeý amaldary kezinde barymtashylardyń 21 jylqyny Semeı qalasyndaǵy kásipkerge satyp jiberip, toǵyzyn soıyp alǵany anyqtalyp otyr.

«Qujatsyz jylqyny satyp alǵan kásipkerge qatysty shara qoldanylady. Atalǵan jaǵdaıǵa baılanysty Qylmystyq kodekstiń «mal urlyǵy» baby boıynsha sotqa deıingi tergeý amaldary bastaldy. Kúdiktiler qamaýǵa alyndy», - dep habarlaıdy Pavlodar oblystyq ІІD-niń baspasóz qyzmetinen.