Pavlodar oblysynda úıinen ketip qalǵan oqýshy shóp jınaıtyn qoradan tabyldy
PAVLODAR. QazAqparat – Pavlodar oblysynda jetinshi synyp oqýshysy úıinen ketip, qaıtyp oralmaǵan. Ol araǵa bes saǵat salyp, óz úıiniń aýlasyndaǵy shóp qoradan aman-esen tabyldy, dep habarlaıdy QazAqparat.
«Keshe shamamen saǵat 16:00-de Malınovka orta mektebiniń 7 synyp oqýshysy úıinen ketip, sol kúıi oralmaǵan», - dep jazdy Pavlodar oblysy Sharbaqty aýdanynyń ákimi Ázilhan Ábeýov áleýmettik jelidegi paraqshasynda.
Polıtsııa qyzmetkerleriniń jedel is-qımyly men Malınovka aýyly turǵyndarynyń atsalysýy arqasynda bala sol kúni saǵat 22:50-de óz úıiniń aýlasyndaǵy shóp qoradan din aman tabylǵan.
Balany medıtsınalyq qyzmetkerler tekserip shyqty, dep naqtylady aýdan ákimi.
«Іzdeý jumystaryna atsalysqandardyń barlyǵyna alǵysymdy bildiremin. Qurmetti jerlester, óz balalaryńyzǵa abaı bolyńyz», - dep jazdy Á. Ábeýov.
