Pavlodar oblysynda ustazdarǵa qosymsha tólem jasaýǵa 3,7 mlrd teńge bólindi
PAVLODAR. QazAqparat - Pavlodar oblysynda jańartylǵan bilim berý mazmuny boıynsha oqý baǵdarlamalaryn júzege asyratyn ustazdardyń eńbekaqysyna qosymsha tólem jasaý úshin bıylǵy jyly respýblıkalyq bıýdjetten 3,7 mlrd teńge bólingen, dep habarlaıdy pavlodarnews.kz.
«Sońǵy úsh jylda biliktiligin arttyrý kýrstarynda 8000-nan astam pedagog oqytylǵan», - dedi oblys ákimdiginde ótken jıynda aımaq basshysynyń orynbasary Meıram Begentaev.
«Onyń ishinde bilim berý mekemeleriniń basshylary men olardyń orynbasarlary, qalalyq jáne aýdandyq bilim berý bólimderiniń ádiskerleri bar. Úsh tildi bilim berýge kóshý aıasynda aǵylshyn tilin qarqyndy oqý kýrstarynan fızıka, hımııa, bıologııa jáne ınformatıka pánderiniń 955 ustazy ótken. Jaratylystaný-matematıka tsıklynan aǵylshyn tilinde sabaq beretin ustazdardyń sany - 455 adam. Sáıkesishe, olar 35 myń teńgeden astam qosymsha aqy alady. Bul maqsatta respýblıkalyq bıýdjetten 286 mıllıon teńge qarastyrylǵan».
Oblys ákiminiń orynbasary ótken jyly testileý protsedýrasyna oblys boıynsha jalpy bilim berý mektepterinen 4602 ustaz qatysqanyn atap ótti.
«Attestattaýdyń jańa formaty ustazdardyń kásibı sheberlik deńgeıiniń ındıkatory bolyp tabylady. Biliktilik testileýinen 374 ustaz sátti ótip, jańa format boıynsha sanat aldy. Sonymen qatar, 103 ustaz «sheber ustaz», 1298 ustaz «pedagog zertteýshi» sanatyn rastady. Bul mamandardyń biliktiliginiń sapaly áleýetin kórsetedi. Ótken jyldyń 1 qyrkúıeginen bastap mektep ustazdaryna pedagogıkalyq sheberlik úshin 30-50 paıyz ústemaqy belgilengen. Bul maqsatta bıyl 1,3 mıllıard teńge qarastyrylǵan», - dedi ol.
