Pavlodar oblysynda úsh mal bordaqylaý alańy salynady
ASTANA. QazAqparat -Ertis óńirinde bıyl jańadan 9500 mal basyna arnalǵan úsh bordaqylaý alańy salynady, dep habarlaıdy pavlodarnews.
Bul týraly agenttikke oblystyq aýyl sharýashylyǵy basqarmasy mal sharýashylyǵy bóliminiń bas mamany Aıdos Jaqypov aıtty.
«Qurylys jumystary bastalyp ketti. Jańadan salynatyn eń kólemdi 5000 basqa arnalǵan alańdy jelezındik «Pahar» ShQ salmaq. Oǵan qosa, jelezındik «Aı-Agro» men Maı aýdanynyń «MYflot» ShQ-tary árqaısy birden 1500 basqa arnalǵan alańnyń qurylysyn qolǵa aldy. Al, baıanaýyldyq «Jaıma» sharýa qojalyǵynda qazirgi kezde 1500 basqa shaqtalǵan bordaqylaý alańy bar. Endi ony qosymsha 3000 basqa keńeıtpek. Bordaqylaý alańdaryna sharýa qojalyqtary jartysyn óz qarajattaryna salsa, qalǵan qarjyny memleket tarypnan jeńildetilgen nesıemen alady», - dedi Aıdos Jaqypov.
Bas mamannyń aıtýynsha, mundaı alańdardyń kóbeıýi et óndirisin arttyrýǵa septigin tıgizedi.
«Óńirimizde ótken jyly 52 myń tonna et jáne et ónimderi shyǵaryldy. Onyń ishinde 1150 tonnasy eksporttalǵan bolatyn», - dedi Aıdos Jaqypov.
Bıyl 900 tonna eksporttaý josparlanǵan. Qazirgi kezde 346 tonna shyǵarylyp, jospardyń 37,8 paıyzy oryndaldy. Óndiriske paıdaly alańdardyń arqasynda bul kórsetkishter arta túsedi. Aıta keteıik, búgingi tańda oblysta 13400 basqa arnalǵan 13 bordaqylaý alańy bar.
