Pavlodar oblysynda úsh aıdyń ishinde 55 jemqor áshkerelengen

ASTANA. QazAqparat - Pavlodar oblysynda ótken jyly 146 jemqorlyq jóninde qylmystyq isti tergelse, 2018 jyly úsh aıda 55 is ashylǵan. Bul týraly óńirlik kommýnıkatsııalar qyzmetinde ótken baspasóz jıynynda Sybaılas jemqorlyqqa qarsy is-qımyl ulttyq bıýrosynyń Pavlodar oblysy boıynsha departamenti basshysy Denıs Shakenov málim etti, dep habarlaıdy pavlodarnews.kz.

Departament basshysynyń aıtýynsha, osy jyldyń birinshi toqsanynda tirkelgen qylmystardyń sany ótken jylǵymen salystyrǵanda 77 paıyzǵa artqan. Jemqorlyq boıynsha burynǵydaı Pavlodar men Ekibastuz kósh bastap tur. Aýdandar arasynda Baıanaýyl aldyńǵy qatarda. Monıtorıng qorytyndysy boıynsha eń jemqorlyq jaılaǵan salalar jer qatynastary men aýyl sharýashylyǵy bolyp shyqty. Denıs Shakenov erekshe rezonansty isterdi jýrnalısterdiń esine saldy. Agenttik buryndary Ekibastuz TÚKSh bóliminiń mamany Ǵabdolla Shormanov óziniń sybaılasy Baqyt Dákenaımen birge segiz jyl ishinde Monǵolııadan 31 qonys aýdarýshylardy aldap kelgendigi jóninde habarlaǵan bolatyn. Sheneýnik jer telimderin berý jóninde ákimdiktegi laýazymdy tulǵalardyń qolyn kóshirip, jalǵan qujat daıyndap kelgen. Odan keıin, ózi «Gorvodokanal» men «Gorelektroset» uıymdaryna baryp ákim atynan jańadan qonystanýshylarǵa tez arada sý men jaryq tartýyn ótingen. Bul isi úshin ol oralmandardan 150 myńnan 500 myń teńgege deıin syıaqy alyp otyrǵan.

«Bıyl Shormanov pen Dakenaıdyń áreketterimen baılanysty taǵy 20-dan astam qylmys tirkeldi», - dedi Denıs Shakenov. - Bul memlekettik jer qoryna jeke turǵyn úı qurylysy salynǵan 20-dan astam jer telimi. Tergeý barysynda joǵaryda atalǵan jerler memleketke qaıtarylyp, nátıjesinde zańdy turǵyda quqyqtary buzylǵan azamattarǵa berildi».

 Spıker oǵan qosa, «Fıtosanıtarııa» RMK jetekshisi Nyǵmet Belgibaevtyń sotqa deıingi tergeýi aıaqtalǵanyn atap ótti. Tergeý boıynsha sheneýnik ǵımaratty jylytý maýsymyna daıyndaý jóninde memlekettik satyp alýdyń jalǵan kelisimshartyn jasaǵany, qazynalyq arnaıy tehnıkany qoldanǵany úshin kásipkerler bergen bıýdjettik aqshany ıemdenip alǵany anyqtaldy. Nyǵmet Belgibaev keltirilgen 500 myń teńge shyǵyndy memleketke tolyq qaıtardy.

 Denıs Shakenovtyń aıtýynsha, sheneýnikterdiń ustalýynan keıin jemqorlyqqa qarsy kúsh quqyqbuzýshylyq jaǵdaıyn muqııat saralap, budan bylaı mundaı jaǵdaılarǵa jol bermeý úshin shara qoldanady. Mysaly, Pavlodar oblysynyń aýyl sharýashylyǵy basqarmasynda Dúzdembaev isin tergeýden keıin jemqorlyqqa qarsy qyzmettiń usynýymen sýbsıdııa alý úshin qaıtalanyp berilgen ótinishti qaraý tártibi qarastyrylǵan.