Pavlodar oblysynda ulttyq sanaq júrgizetin adam jetispeıdi
Bul týraly ulttyq statıstıka bıýrosy departamentiniń basshysy Jahan Jákenov oblys ákimdiginde ótken apparat keńesinde aıtty.
- 11 qazandaǵy jaǵdaı boıynsha onlaın rejıminde 282 myń 717 adam nemese óńir turǵyndarynyń 38 paıyzy ótken. Bul kórsetkish boıynsha oblysymyz respbýlıkada segizinshi orynda tur. Birinshi orynda 80,8 paıyzben Maı aýdany men Jelezın aýdany (80,5 paıyz) kósh bastap tur. Pavlodar qalasynda kórsetkish tómen – 28,9, Ekibastuzda – 32,4. 1 qazannan bastap ulttyq sanaq dástúrli - oflaın túrde bastaldy. 11 qazandaǵy jaǵdaı boıynsha 30 myń 553 adam ótti. Sanaqqa jatatyn halyqtyń 80%-ǵa jýyǵy Pavlodar qalasynda - 48,4%, Ekibastuz qalasynda – 20,3%, Aqsý qalasynda - 9,3% shoǵyrlanǵan, - dedi Jahan Jákenov.
Onyń aıtýynsha, oflaın sanaq nátıjesiniń tómendigine baılanysty oblystyq jospar qurylǵan.
1 qazanda ulttyq sanaq júrgizýge adam sany tolyq jasaqtalǵan jáne qosymsha daıyndaldy. Búginde sanaq júrgizetin 870 qyzmetkerdiń 530-y ǵana jumys istep jatyr. Turǵyndardyń az qamtylýyna sanaq júrgizetin mamandar sanynyń tapshylyǵy da áser etýde. Pavlodar, Ekibastuz, Aqsý qalalarynda 293 adam jetpeıdi. Kún saıyn suhbat alýshy retinde jumys isteýden ortasha eseppen alǵanda 50 shaqty adam bas tartady. Sonymen qatar 30 shaqty adamnyń qujattaryn qabyldaý júrgiziledi.
- Birinshi kúnderi 80 paıyzy bas tartty. Sebebi jeke turǵyn úıler men kópqabatty úılerdiń turǵyndary onlaın ótetinin nemese ótkenin aıtqan. Qazir jaǵdaı rettelip keledi. Intervıýer retinde muǵalimderdi, PIK, ÓK, baǵbanshylyq ujymdarynyń tóraǵalaryn, eriktilerdi tartý máselesi pysyqtalýda. Sondaı-aq «Pavlodarenergosbyt» JShS jáne «Pavlodarvodokanal» JShS baqylaýshy qyzmetkerlerin tartý boıynsha kómek kórsetýińizdi suraımyn. Suhbat alýshylardy yntalandyrý maqsatynda Ekibastuz qalasynda jeke sektorda saýalnama júrgizý úshin qosymsha aqy tóleý máselesi sheshildi, Pavlodar qalasy boıynsha bul másele pysyqtalýda, - dedi departament basshysy.
Bul rette oblys ákimi Ábilqaıyr Sqaqov «Pedagog mártebesi týraly» Zańdy eske salyp, basqa jolyn qarastyrýdy, sondaı-aq 15 qazanǵa deıin ulttyq sanaq boıynsha jumysty jedeldetýdi tapsyrdy.
- Intervıýer bas tartqan jaǵdaıda B, S josparlaryn qarastyrý kerek edi. Ulttyq sanaq – 10 jylda bir ret ótkiziletin mańyzdy shara. Intervıýer úshin onlaın formatta, tegin ınternet jelisine qosylý jolyn usynyp, yntalandyrý úshin bıýdjetten tys qarajat qarastyrý qajet. Eń bastysy - quqyq qorǵaý organdarynyń ókilderi jáne ýchaskelik ınspektoramen birge qaýipsizdikti qamtamasyz etý qajet, - dedi Ábilqaıyr Sqaqov.
