Pavlodar oblysynda týý kórsetkishi azaıdy: Bolat Baqaýov máseleni zertteýdi tapsyrdy

PAVLODAR. QazAqparat - Pavlodar oblystyq máslıhatynyń kezekten tys sessııasynda óńir ákimi Bolat Baqaýov óńirdegi demografııalyq ahýaldy zertteýge tapsyrma berdi, dep habarlaıdy QazAqparat pavlodarnews.kz saıtyna silteme jasap.

«Bizde jańa týǵan balalardyń sany nelikten azaıyp jatqanyn zertteýimiz kerek. Óńirde kóptegen aýrýlar boıynsha, onyń ishinde onkologııalyq aýrýlarǵa qatysty jaǵdaı nelikten kúrdeli? Osy oraıda ekologııalyq ahýalǵa kiná taǵa bermeýimiz kerek. Sondyqtan osy aıtylǵan kúrdeli máselelerdi birlese sheship, naqty nátıjeni kózdeýimiz qajet», - dedi Bolat Baqaýov.  

Aımaq basshysy 2019 jyly halyq qalaýlylary óńirdiń tynys-tirshiligin jiti nazarda ustaýy qajettigin atap ótip, turǵyndar alańdaýshylyq bildirgen máselelerdi birlese sheshýge shaqyrdy.

«Oblys boıynsha shaǵyn jáne orta kásipkerlik sýbektileriniń sany azaıýda. Barlyq basqarmalarǵa bıznesti qoldaýdy tapsyrýdamyz. Bul jerde «Atamekenniń» de qosar úlesi zor bolýy kerek», - dedi ol.  

Otyrys barysynda «Romat» farmatsevtıkalyq kompanııasyna qatysty másele de nazardan tys qalmady.

«Kezinde Qazaqstannyń 50 paıyz naryǵyn dári-dármekpen qamtamasyz etken kompanııanyń jaǵdaıy ne bolǵanyn bilesizder. Máselelerdi ótip ketkennen keıin emes, olardyń aldyn-alyp ýaqtyly sheshýge tyrysý kerek. Osy oraıda, barlyqtaryńyzdy belsendilikke shaqyramyn», - dep atap ótti Bolat Baqaýov.

Esterińizge sala keteıik, Pavlodar oblysynda sońǵy 10 jylda aýyl turǵyndarynyń sany 34 myńǵa azaıdy. Qazirgi kezde aýylda turatyn pavlodarlyqtardyń úlesi nebári 30% quraıdy.