Pavlodar oblysynda túrmeden qashqan sottalýshy elordadan ustaldy
PAVLODAR. QazAqparat – Elordaǵa óziniń azamattyq nekedegi áıeli men qyzyna qashyp kelgen 38 jastaǵy er adam Pavlodardyń tergeý ızolıatoryna qamaldy, dep habarlaıdy QazAqparat tilshisi.
«Nur-Sultan qalasynda Shiderti kentindegi qaýipsizdigi barynsha tómen mekemede AP-162/10 kolonııasynda jazasyn óteýden jaltarǵan 38 jastaǵy sottalýshy ustaldy. Sottalǵan azamat 2019 jyldyń tamyz aıynda mekeme aýmaǵynan ketip, keshke kolonııaǵa oralmaǵan», - dep habarlady Pavlodar oblysynyń qylmystyq-atqarý júıesi departamentiniń baspasóz qyzmeti.
Vedomstvo bul mekemede sottalǵandardyń kolonııa aýmaǵynda jumys isteýge quqyǵy bar ekenin eske saldy. Qashyp ketken azamat alaıaqtyq úshin jazasyn ótep jatqan. Ol sottalǵanǵa deıin elordada turǵan. Osy kolonııaǵa aýystyrylǵanǵa deıin Pavlodardyń ortasha qaýipsizdik mekemesinde jazasyn ótep jatqan bolatyn. 2019 jyldyń sáýirinde sot onyń mekemeni aýystyrý týraly ótinishin qanaǵattandyrǵan.
«QAJ jedel qyzmetkerleri sottalýshynyń ornalasqan jerin anyqtaý boıynsha jumysty Ekibastuz qalasy polıtsııa basqarmasynyń qyzmetkerlerimen birlesip júrgizdi. Bir jyldan astam ýaqyt boıy biz ustalǵan azamatty taba almaǵan edik. Qazir ol Pavlodar qalasynyń tergeý ızolıatorynda qamaýda. Biz ony ortasha qaýipsizdik mekemesine qaıtarý úshin sotqa materıal jiberemiz», - dedi AP-162/10 mekemesiniń basshysy.
Jaýap alý kezinde sottalýshy kinásin moıyndap, Nur-Sultan qalasyna otbasyna barǵanyn aıtty. Elordada onyń azamattyq nekedegi jubaıy men qyzy turady.
Er adam jasyrynyp júrgen ýaqytta ártúrli mekenjaılarda turǵan, túrli jumys istep kún kórgen.
Ekibastuz qalasynyń mańyndaǵy Shiderti kentiniń qaýipsizdigi barynsha tómen AP-162/10 mekemesinde 62 sottalýshy jazasyn ótep jatyr.
