Pavlodar oblysynda Tuńǵysh Prezıdent kúni qarsańynda 300-den astam shara ótedi
PAVLODAR. QazAqparat - QR Tuńǵysh Prezıdenti kúnin merekeleý boıynsha bekitilgen josparǵa sáıkes Pavlodar óńirinde 3000-ǵa jýyq adamnyń qamtylýymen 300-den astam shara ótkiziledi.
Bul týraly oblys ákimdiginde ótken apparattyq jıyn barysynda ishki saıasat basqarmasynyń basshysy Ernur Dáýenov aıtty, dep habarlaıdy pavlodarnews.kz .
«24 qarasha - 1 jeltoqsan aralyǵynda óńirde áleýmettik-óndiristik mańyzy bar nysandar qoldanysqa beriledi. Naqtyraq aıtsaq, Pavlodarda qospaly alıýmınıı shyǵaratyn «Guissenhaus» JShS óndiris ornyn iske qosý, «Saryrarqa» shaǵynaýdanynda turǵyn úıdi qoldanysqa berý josparlanyp otyr. Ekibastuzda Energetıkter kóshesinde kópqabatty turǵyn úıdiń kiltterin tabystap, qyzanaq ósirý boıynsha jylyjaı, Sharbaqty aýdanynda qaıta qurýdan keıin memlekettik tilde tálim-tárbıe beretin 60 orynǵa shaqtalǵan balabaqsha, Ýspen aýdany Tavoljan aýylynda medıtsınalyq pýnkti, Jelezın aýdanynyń Jelezın aýylynda qaıta qurýdan keıin 10 páterlik jataqhana, Merǵalym eldi mekeninde ánshi Roza Muqataevanyń qatysýymen klýb ashylady. Baıanaýyl aýdanynda «Baıan Sulý - Qozy Kórpesh» jáne «Máńgilik el» alleıalary, eki páterli tórt úı, qaıta qurýdan keıin aýdandyq stadıon tapsyrylady. Budan basqa, «Rýhanı jańǵyrý» baǵdarlamasy aıasynda «Meniń tabysym - elimniń tabysy» atty daryndy jastardyń oblystyq konkýrsy, kásipkerlik ıdeıalar men startaptar jármeńkesi uıymdastyrylady».
Oblystyq mádenıet, muraǵattar jáne qujattama basqarmasynyń basshysy Ardaq Raıymbekovtyń aıtýynsha, 14 qarasha kúni Estaı atyndaǵy mádenıet saraıynda Qazaqstan estradasynyń juldyzy Qaırat Nurtastyń kontserti, 26 qarasha kúni Isa Baızaqov atyndaǵy oblystyq fılarmonııada Rústembek Omarov atyndaǵy qazaq ulttyq aspaptary orkestriniń «Uly dala saryny» kontserti ótedi. 27-28 qarasha kúnderi Almaty qalasy «Otyrar sazy» orkestriniń gastroldik sapary uıymdastyrylady. Negizgi saltanatty sharalar 29 qarasha kúni saǵat 15.00-de Estaı atyndaǵy mádenıet saraıynda, 30 qarashada aýdandar men qalalarda ótedi.
- Pavlodarlyqtar men qala qonaqtary «Elbasy Pavlodar oblysynda» fotokórmesin tamashalaı alady, - deıdi Ardaq Raıymbekov. - Rústembek Omarov atyndaǵy qazaq ulttyq aspaptar orkestri, Anel Arynova men «Shamıl» toby Elbasynyń súıip tyńdaıtyn ánderin oryndaıdy. Sonymen qatar, Pavlodar sahnasynda alǵash ret astanalyq «Qasıet» tobynyń jáne Aıbek Bekbosynovtyń oryndaýynda «Elbasy tolǵaýy» kúıiniń tusaýy kesiledi. Almatydan termeshi Tatıana Býrmıstrova jáne QR halyq ártisi, Memlekettik syılyqtyń, Qazaqstan jastar odaǵy syılyǵynyń, Qyrǵyzdyń Abylas Moldabaev atyndaǵy halyqaralyq syılyqtarynyń laýreaty Nurǵalı Núsipjanov shaqyrylyp otyr. Oblys ákimi Bolat Baqaýov Tuńǵysh Prezıdent kúni qarsańynda nysandardyń ashylýyn bálkim bir kúnde ótkizý týraly usynys bildirdi.
«Mereke qarsańynda qalalar men aýdandardyń ákimderi, memlekettik organdardyń basshylary jumysta joǵary jetistik kórsetken qyzmetkerlerdi yntalandyrý jáne syıaqy berýdi qarastyrýy qajet. Sonymen qatar, kásipkerlik, saýda jáne týrızm basqarmasy merekelik jeńildikter boıynsha aktsııalar men jármeńkeler uıymdastyrǵany jón», - degen aımaq basshysy merekelerge daıyndyq sapasyn jeke baqylaýǵa alýdy óziniń orynbasary Meıram Begentaevqa tapsyrdy.
