Pavlodar oblysynda tórt jyl buryn jylqy urlaǵandar ustaldy
ASTANA. QazAqparat - Pavlodar oblystyq ІІD-niń qylmystyq polıtsııa qyzmetkerleri óńir turǵyndarynyń jylqysyn urlaýmen aınalysyp júrgen eki er adamdy qolǵa túsirdi, dep habarlaıdy «QazAqparat» HAA tilshisi Pavlodar oblysynyń ІІD baspasóz qyzmetine silteme jasap.
Vedomstvonyń habarlaýynsha, eki azamat jedel-izdestirý is-sharalaryn júrgizý barysynda ustalǵan. Olardyń biri Pavlodar oblysynyń Baıanaýyl aýdanynyń 42 jastaǵy turǵyny bolsa, ekinshisi Qaraǵandy qalasynyń 59 jastaǵy turǵyny bolyp shyqqan. Ekeýi de buryn mal urlaǵany úshin qylmystyq jaýapkershilikke tartylǵan.
«Bıylǵy jyldyń maýsym aıynda Baıanaýyl aýdanynda tún jamylǵan ekeýi sharýa qojalyqtardyń birinen 15 bas jylqy aıdap ketken. Budan bólek naýryz aıynda Baıanaýyl aýdanyndaǵy 11 bas jylqynyń, 2013 jyly Maı aýdanyndaǵy 20 bas jylqynyń urlyǵyna da ekeýi qatysty bolyp shyqty. Kúdiktiler jylqyny Qaraǵandy oblysynda satyp júrgen. Óz is-áreketterimen ustalǵandar aýyl turǵyndaryna iri shyǵyn keltirgen», - deıdi ІІD baspasóz qyzmeti.
Kúdiktiler qazir qamaýda otyr. Tergeý barysynda olardyń ózge de mal urlyǵyna qatysy bar-joǵy anyqtalatyn bolady.
