Pavlodar oblysynda tobynan adasyp qalǵan birqazan tabyldy
PAVLODAR. QazAqparat - Pavlodar oblysy ormanshylyǵy biri jyly jaqqa ushyp kete almaı qalǵan birqazandy baǵyp otyr, dep habarlaıdy pavlodarnews.kz .
Bul týraly Maı aýdany Kóktóbe ormanshylyǵynyń qoryqshysy ıÝrıı Grıchýshın málim etken.
«Adasyp qalǵan kezekti qús Shyǵan kentiniń mańynda júrgen, - deıdi ıÝrıı Grıchýshın. - Alǵashqy bolyp qusty qutqarýshylar kórip qalǵan da, dereý jergilikti qoryqshylarǵa qońyraý shalǵan. Gosha esimdi birqazandy ýaqytsha monshada ustaımyz. Aýlada erkin júre alady. Qusty ýaqytsha bizdiń qyzmetkerler alyp ketti. Azyqtandyrýǵa jergilikti balyqshylar kómektesedi».
Onyń aıtýynsha, salmaǵy tórt kelideı tartatyn qus birden segiz balyqty jep qoıady. Aýdannyń veterınarlyq dárigerleri qusty álsizdikten tobynan adasyp qalǵanyn, jeke júrip qorek taba almaǵanyn aıtyp otyr.
Birer kúnniń ishinde qusty Qaraǵandy qoryǵynyń qyzmetkerleri tekserip, alyp ketýi kerek. Birqazannyń taǵdyry osydan keıin belgili bolady.
Eske sala keteıik, Ertis óńirinde sońǵy kezderi birneshe birqazan qutqarylǵan. Tipti, qanattylarǵa Prıanık, Prınts, Gosha jáne Nastıa esimderi berilgen.
