Pavlodar oblysynda Temirǵaly Nurekenniń kesenesi boı kóterdi
PAVLODAR. QazAqparat - Pavlodar oblysynyń Esilbaı aýylynda qoǵam qaıratkeri Temirǵaly Nurekenge kesene turǵyzyldy, dep habarlaıdy QazAqparat pavlodarnews.kz saıtyna silteme jasap.
Temirǵaly Nureken kesenesiniń ashylýyna arnalǵan sharaǵa 700-den astam adam jınaldy. Islam dinin taratqan belgili tulǵanyń ómirin «Rýhanı jańǵyrý» baǵdarlamasy aıasynda zertteý týraly usynysty Sharbaqty aýdanynyń ákimi Balǵabaı Ybyraev bildirgen. Nátıjesinde muraǵat materıaldary men tarıhı sýretter, onyń urpaqtary týraly málimetter tabylǵan. Temirǵaly Nureken XIX ǵasyrdaǵy qoǵam qaıratkeri, Semeı oblysy Pavlodar ýeziniń Seıten bolysyn basqarǵan. 1905 jyly Qarqaraly, Pavlodar ýezi qazaqtarynyń atynan Іshki ister mınıstrligine narazylyq bildirip, petıtsııa jazýǵa qatysqan. Petıtsııany qazaq tilinen orys tiline aýdarǵan. 1907 jyly Ekinshi Memlekettik Dýmaǵa Semeı oblysynan depýtat bolyp saılanyp, Musylman fraktsııasynyń múshesi bolǵan. Ómirin aǵartýshylyqqa arnaǵan jan meshit pen mektep ashqan. 1992 jyly Esilbaı aýylynyń turǵyndary meshit turǵyzyp, oǵan Temirǵaly Nurekenniń esimin bergen.
Aýdandyq ishki saıasat bóliminiń basshysy Serjan Imanqulovtyń aıtýynsha, keseneniń qurylysy týraly oı oblystyq qoǵamdyq keńeste aıtylǵan.
«Rýhanı jańǵyrý» baǵdarlamasy aıasynda osyǵan uqsas jobalardy júzege asyrý maqsatynda usynys maquldanyp, «Sharbaqty - týǵan jer» atty qoǵamdyq qoryn qurý týraly ortaq sheshim qabyldandy. Qorǵa Shegeren aýyldyq okrýginiń turǵyndary, mekeme-uıymdardyń qyzmetkerleri qarjy aýdardy. Mazardy turǵyzý jobasyn oblystyq saraptaý komıssııasy bekitip, oblys ákimi Bolat Baqaýov maquldandy», - deıdi Serjan Imanqulov.
Jobany júzege asyrý tamyz aıynda bastaldy. Sharaǵa aımaq basshysy Bolat Baqaýov, oblys jáne aýdannyń qurmetti azamattary: Ǵarıfolla Esim, opera ánshisi Shahımardan Ábilov, Temirǵaly Nurekenniń urpaqtary, demeýshiler men jergilikti turǵyndar qatysty.
«1992 jyldan beri Esilbaı aýylynda meshit ashylǵaly beri osynda kele bastadym. 1937 jyly 150 orynǵa arnalǵan meshit jabylyp qalǵan. 1992 jyly atam týraly materıaldar izdeı bastadym. Máskeýde onyń kitaptary men sýretterin taýyp alyp, barlyq qujattardy oblystyq ólketaný murajaıyna tapsyrdym. Bizdiń bolashaq urpaq óziniń týǵan jeriniń tarıhyn bilý kerek», - deıdi shóberesi Kamal Bekturova.
Nysannyń ashylýyna oraı Esilbaı aýylynda on bir kıiz úı tigildi, duǵa oqylyp, as berildi. Sondaı-aq shara barysynda ulttyq oıyndardan jarystar uıymdastyryldy.
