Pavlodar oblysynda tasjoldardyń jabylýy saldarynan 200-den astam adam kepteliste qaldy
PAVLODAR. QazAqparat - Pavlodar oblysy Shiderti kentine jaqyn mańda tasjoldardyń jabylýy saldarynan 204 adam mingen 61 kólik kepteliste qalyp qoıdy, dep habarlaıdy «QazAqparat» HAA tilshisi.
Qaraǵandy jáne Aqmola oblystaryndaǵy joldardyń jabylýyna baılanysty respýblıkalyq mańyzy bar «Qyzylorda-Pavlodar» jáne «Astana-Ereımentaý-Shiderti» tasjolynda Shiderti kentiniń mańyndaǵy «Rýbej» baqylaý beketinde 61 tehnıka: úsh jolaýshylar avtobýsy, 55 júk avtomobıli, úsh jeńil mashına kepteliste turyp qalǵan.
«Kólikterde 204 adam, sonyń ishinde tórt bala bolǵan. 22 adam Pavlodar-Qaraǵandy baǵytyndaǵy jolaýshylar poıyzymen jiberildi», dep habarlady Pavlodar oblystyq tótenshe jaǵdaılar departamentinde.
Ekibastuz tótenshe jaǵdaılar basqarmasy men jergilikti atqarýshy organdardyń mamandary jolda qalyp qoıǵan adamdardy «Kempıng» kesheniniń aýmaǵyndaǵy jylytý ornyna ornalastyrdy. Taǵy 42 adam Shiderti kentindegi orta mektepke, 22 adam - Q.Sátpaev atyndaǵy emdeý-saýyqtyrý ornyna jetkizildi. Olarǵa ystyq tamaqtar berilýde.
Medıtsınalyq kómek kórsetý úshin kezekshilikke «Shiderti» medıtsınalyq-qutqarý beketiniń jol brıgadasy jumyldyryldy.
