Pavlodar oblysynda sývenır aqshany paıdaǵa jaratqan alaıaq ustaldy

ASTANA. QazAqparat - Pavlodar oblysy Aqsý qalasynyń turǵyny bazarda sývenırlik jalǵan aqshamen tólem jasap, turǵyndardy aldap ketken, dep habarlaıdy QazAqparat tilshisi Pavlodar oblysy ІІD-niń VKontakte paraqshasyna silteme jasap.

Polıtsııaǵa alaıaqtyq týraly aryzben zeınetker júginedi. Onyń aıtýynsha keshke taman bazarda shıe satyp otyrǵan kezde oǵan bir beıtanys adam jaqyndapty. Álgi adam zeınetkerden jalpy somasy 1900 teńge quraıtyn shıesin satyp alady. Erkek ekige búktelgen 10 000 teńgelik kýpıýramen tólem jasaǵan. Zeınetker aqsha belgisin tekserip almaı, birden oǵan oısyz 8100 teńge mólsherindegi qaıtarymdy ustata salady. Qaskúnem ketkennen keıin ǵana zeınetker aqsha belgisiniń sývenırlik ekenin baıqaǵan.

«Jábirlenýshi alaıaqtyń jalǵyz qurbany bolmaǵan, polıtsııaǵa osyǵyn uqsas taǵy 4 ótinish kelip túsken. Kesek aqshasy bar tapqyr satyp alýshyǵa bazardaǵy satýshylar tez jáne artyq suraqsyz qyzmet kórsetken. Júrgizilgen is-sharalar barysynda Aqsý qalasynyń polıtsııa qyzmetkerleri alaıaqtyǵy úshin 40 jastaǵy kúdikti er adam anyqtalyp, ustaldy. Ustalǵan azamatqa qatysty QR QK-niń 190-baby (Alaıaqtyq) boıynsha tergeý júrgizilýde», - delingen habarlamada.

ІІD qyzmetkerleri oblys turǵyndaryna qyraǵylyq tanytýdy suraıdy.

«Esińizde bolsyn, sývenırlik aqsha belgisinde joǵaryda jáne tómende qyzyl áriptermen «tólem quraly bolyp tabylmaıdy» degen eki tildegi jazýy bar. Qaltańyzǵa, sómkeńizge nemese kassaǵa salar aldynda mindetti túrde ony ashyp, jazýdyń bar ne joǵyn teksirińiz», - dep eskertedi polıtsııa qyzmetkerleri.