Pavlodar oblysynda sýǵa batyp ketken eki balanyń denesi izdestirilýde
PAVLODAR. QazAqparat - Óńirde demalys kúnderi arnaıy shomylýǵa jabdyqtalmaǵan oryndarda bes bala sýǵa batyp ketti, dep habarlaıdy pavlodarnews.kz.
«Birinshi qaıǵyly jaǵdaı Aqsý qalasynda boldy», - deıdi oblystyq TJD jedel qutqarý jasaǵy basshysynyń orynbasary Serik Sherııazdanov.
Onyń aıtýynsha, bir otbasynan 2004 jáne 2008 jylǵy eki bala sýǵa ketti.
Balalardyń ákesiniń aıtýynsha, olar otbasymen Ertis ózeniniń jaǵasyna demalýǵa shyqqan. Shomylýdy múldem josparlamaǵan. Eki uldyń kishisi sýǵa aıaǵyn salýǵa barǵan kezde taıyp ketken bolý kerek, sýdyń aǵysy balany alyp ketken. Ony kórgen aǵasy sońynan júgirgen. Ókinishke oraı, baýyryn qutqara almady jáne ózi de sýǵa ketti. Birinshi kúni súńgýirler balalardyń denelerin taba almaǵan.
«Sýdyń aǵysy qatty, túbinde jumyr tastar bar», - deıdi Serik Sherııazdanov.
Onyń sózinshe, súńgýirlerdiń ózi ilinip qalyp, ekinshisi kómekke kelip alyp shyqqan. Búgingi kúni izdeý jalǵasýda. Úsh kún belsendi, 7 kún sýdyń betinde passıvti izdeý júrgiziledi. Ol úshin memleket tarapynan qarajat bólinedi. Degenmen, ata-analar senim bildirmese, ári qaraı jekemenshik súńgýirlerdi jaldaı alady. Osy ýaqytqa deıin bir adam qutqarylyp, 9 adam evakýatsııalanǵan. Sondaı-aq, Kenjekól aýylyna dostaryna qonaqqa kelgen 2005 jylǵy jasóspirim Ertis ózeniniń tarmaǵynda sýdan ajal qushqan.
Súńgýirler denesin jaǵadan 10-15 metr qashyqtyqta, 3 metr tereńdikten 20 mınýttyń ishinde alyp shyqty. Pavlodar aýdany Mıchýrıno aýylynda qazanshuńqyrǵa batyp ketken 2007 jylǵy qyz balanyń denesin sol kúni súńgýirler 10 mınýttan soń alty metr tereńdikten anyqtaǵan.
Pavlodarskoe aýylynda keshe túste arnaıy shomylýǵa jabdyqtalmaǵan orynda sýǵa ketken 2006 jylǵy balany saǵat 10.55-te taýyp alǵan.
Aıta keterligi, shomylý maýsymy bastalǵannan beri 15 adam sýǵa batyp
ketken. Onyń jeteýi – bala.
