Pavlodar oblysynda sý tasqyny qaı aýyldarǵa qaýip tóndirip tur
NUR-SULTAN. QazAqparat - QR ІІM Tótenshe jaǵdaılar komıteti Pavlodar oblysynda Ertis ózeniniń tasýynan qaı aýyldarǵa qaýip tónip turǵanyn atady. Biraq atalǵan eldi mekenderde tek shetki birneshe úıdi ǵana sý alyp ketýi múmkin, dep xabarlaıdy QazAqparat tilshisi.
Komıtet basshysy Vladımır Bekkerdiń aıtýynsha, Ertis ózeniniń boıynda muz keptelisi áli bar. Shúlbi qoımasynan jiberiletin sýdyń kólemi sekýndyna 1 500 tekshe metrden 1 200-ge deıin tómendese de, Pavlodar oblysynda muz aqyryndap jyljyp jatyr.
«Bizdiń boljamymyzǵa sáıkes, shamamen 10 kún ishinde ol muz oblys aýmaǵymen ótip, ary qaraı Reseı Federatsııasyna ketedi. Degenmen, Pavlodar oblysy boıynsha sý tasqyny qateri 11 eldi mekenge tónip tur. Olardyń ishinde Kenjekól, Lenınskıı, Aqsý qalasy, Peschanoe, Aqsý kenti, Qarasuq, Tereńkól, Aqquly, Aqsaraı, Jańasaraı, Gosplemenstantsııa sııaqty eldi mekender bar. Barlyǵy Ertistiń boıyn jaǵalaı ornalasqan. Biraq bul jerde mańyzdy bir máseleni eskerý kerek, sý atalǵan eldi mekenderdiń bárin alyp ketedi degen sóz emes. Árbir aýylda sý birneshe úıge ǵana kirýi múmkin. Máselen, Peschanoe aýylynda úsh úıge qaýip tónip tursa, Qarasýda eki-aq úı sýǵa jaqyn tur. Sol sııaqty Aqsý qalasynda bes úıge ǵana sý kirýi múmkin», - dedi V.Bekker elordada ótken baspasóz máslıxatynda.
Aıta keteıik, keshegi brıfıngte komıtet basshysy úlken sýdyń Pavlodar oblysyna qalaı jınalatynyn túsindirdi. Onyń aıtýynsha, búginde Shyǵys Qazaqstan oblysynyń Besqaraı aýdanynda Ertistiń boıymen muzdyń úlken keptelisi paıda boldy. Onyń uzyndyǵy 8 shaqyrymnan asyp otyr. Muzǵa shyǵyp, jarylǵysh zattardy qoıý qaýipti. Sol sebepti ondaı jumystar atqarylǵan joq.
«Búgin keshke qaraı ol jerge sý kóp keledi degen boljam bar. Óıtkeni osydan eki kún buryn Shúlbi gıdroelektr stansasynan sýdy kóptep jibere bastady. Ol jerde sekýndyna 1 500 tekshe metr sý jiberip jatyr. Osy sýdyń arqasynda muz keptelisi ary qaraı jyljıdy degen boljam bar, ıa bolmasa, muzdy jaǵaǵa ıterip shyǵarady», - dedi V.Bekker.
Komıtet basshysynyń sózine qaraǵanda, Shúlbi gıdroelektr stansasynan sýdyń kóptep jiberilýine baılanysty Pavlodar oblysyn sý basý qaýpi bar.
«Krıvınka aýyly mańaıynda Shyǵys Qazaqstan men Pavlodar oblysy shektesedi. Al Shúlbi qoımasynan sýdy kóptep jiberý sharalary jalǵasady. Osyǵan baılanysty Pavlodar oblysyndaǵy jaǵdaı da qıyndaı túsedi. Ol jaqta da eldi mekender bar», - dep atap kórsetti V.Bekker.
Foto: cdn.photocentra.com
