Pavlodar oblysynda sý shaıyp ketken avtojoldaǵy qozǵalys qalpyna keltirildi
ASTANA. QazAqparat - 3 sáýiri kúni Pavlodar oblysy Baıanaýyl aýdanyndaǵy «Aşysý» ózeninde qardyń kúrt erýiniń jáne kólemdi sý aǵysynyń saldarynan «Qalqaman-Baıanaýyl» avtomobıl jolynyń 101-shi shaqyrymynda arnasynan asqan sý avtomobıl jolyn basyp, jol qozǵalysyna shekteý qoıylǵan bolatyn. Jedel sharalardyń arqasynda qazirgi kúni qozǵalys qalpyna keltirildi, dep habarlaıdy QazAqparat Investıtsııalar jáne damý mınıstrliginiń baspasóz qyzmetine silteme jasap.
Aǵystyń qatty jyldamdyǵyn jáne sý ótkizgish qubyrlarymen qosa jol tóseminiń shaıylyp ketý qaýipin eskere otyryp, 4 sáýirge qaraǵan túni erigen qar sýyn aǵyzý jáne sý deńgeıin tómendetý úshin eni 20 metr bolatyn jasandy sýaıyryq jasaý sheshimi qabyldandy.
«Sý aǵysy tómendegennen keıin «QazAvtoJol» UK» AQ, «Kazaqavtojol» RMK jáne «Akjol»JShS merdigerlik uıymy jergilikti atqarýshy bılikpen birlese otyryp, joldy tez arada qalpyna keltirý úshin qajetti qural-jabdyqtar men jol tehnıkasyn jáne barlyq kúshti jumyldyrdy. Sýaıryq ornynda qosymsha dıametri 1,2 metr bolatyn sý ótkizgish qubyrlary ornalastyryldy. Tótenshe jaǵdaılardyń aldyn alý jáne joıý jónindegi aımaqtyq jedel shtaby qyzmetiniń úılesimdi jumysynyń nátıjesinde ýchaskedegi qozǵalys bir táýlik ishinde qaıta qalpyna keltirildi», - delingen baspasóz baıanynda.
