Pavlodar oblysynda sý qubyryn salýǵa bólingen 1,2 mlrd teńge jymqyrylǵan
Bul týraly QazAqparat QR Qarjy mınıstrligi Qarjy monıtorıngi komıtetiniń baspasóz qyzmetine silteme jasap habarlaıdy.
Komıtet taratqan aqparatqa qaraǵanda, atalmysh organ ókilderi jymqyrylǵan qarjyny Pavlodar oblysy boıynsha Ekonomıkalyq tergeý departamenti Pavlodar oblysy prokýratýrasynyń bastamasymen qurylǵan vedomstvoaralyq jedel-tergeý toby sheńberinde oblystyq Sybaılas jemqorlyqqa qarsy is-qımyl departamenti men Ulttyq qaýipsizdik departamenti qyzmetkerlerimen birlesip, «Qazyna» jedel profılaktıkalyq is-sharasy barysynda anyqtaǵan.
Kúdiktilerdiń is-áreketteri QR QK 189-babynyń 4-b. 2-t. (asa iri mólsherde jasalǵan, adamdar tobynyń aldyn ala sóz baılasýy boıynsha senip tapsyrylǵan bóten múlikti ıelenip alý nemese talan-tarajyǵa salý) boıynsha saralandy.
Atalǵan bap sanktsııasynda múlki tárkilenip, belgili bir laýazymdardy atqarý nemese belgili bir qyzmetpen aınalysý quqyǵynan ómir boıyna aıyra otyryp, jeti jyldan on eki jylǵa deıingi merzimge bas bostandyǵynan aıyrý kózdelgen.
Qazirgi ýaqytta kúdikti ustalyp, olarǵa qatysty Pavlodar qalasynyń Mamandandyrylǵan tergeý soty kúzetpen ustaý túrindegi bultartpaý sharasyn sanktsııalady.
«Qylmystyq is boıynsha qylmystyń barlyq mán-jaıyn jáne jasalǵan quqyq buzýshylyqqa qatysy bar basqa da adamdardy anyqtaýǵa baǵyttalǵan tergeý áreketteri júrgizilýde»,-delingen habaramada.
