Pavlodar oblysynda sý basýy múmkin 30 shaqty eldi meken baqylaýǵa alyndy
Bul týraly Óńirlik kommýnıkatsııalar qyzmetinde ótken baspasóz máslıhatynda Pavlodar oblysy TJ departamentiniń basshysy, azamattyq qorǵaý polkovnıgi Ernur Ótegenov málim etti.
«Ótken jyldardaǵy sý tasqyny kezeńderiniń taldaýlaryna súıene otyryp, 28 eldi meken baqylaýǵa alyndy. Sý tasqyny kezeńin baǵalaý úshin Aqtoǵaı, Baıanaýyl jáne Aqsý aýyldyq aımaqtarynyń sý basýy múmkin qaýipti ýchaskelerine shyǵý júzege asyryldy. Mundaı ýchaskelerge turaqty túrde monıtorıng júrgiziledi. Onda halyq sany 3672 adam bolatyn 972 turǵyn úı, sondaı-aq avtomobıl joldarynyń 4 ýchaskesi ornalasqan. Bul - respýblıkalyq Qalqaman-Baıanaýyl-Úmitker-Ýlıanovskıı jolynyń 101 jáne 105 shaqyrymy, Baıanaýyl aýdanynyń Kókdombaq, Jańajol jáne Jańatilek aýyldarynyń jergilikti mańyzy bar joldary», - dedi Ernur Ótegenov.
TJ departamentiniń bastyǵy sý tasqyny kezeńindegi tótenshe jaǵdaı qaýpi týyndaǵan jaǵdaıda halyqtyń arasynda túsindirý jáne oqytý boıynsha jumystar turaqty negizde júrgiziletinin aıtady.
«Pavlodar qalasynyń 2030 jylǵa deıingi jańa qosymsha kelisimge sáıkes bas josparyna qosymsha Pavlodar qalasynyń jerasty sýlarynyń drenajdyq jáne nóserlik jelilerine gıdrogeologııalyq kartamen tehnıkalyq - ekonomıkalyq negizdemeni ázirleýge 116.4 mln teńge bólindi. Jobany aıaqtaý merzimi 2021 jyldyń sońyna deıin uzartyldy», - deıdi Ernur Ótegenov.