Pavlodar oblysynda shekaramen oq-dári tasymaldaýǵa qatysty is toqtatyldy
PAVLODAR. QazAqparat - Pavlodar oblysynyń Jelezın aýdandyq soty «Urlytóbe» shekara beketi arqyly oq-dári tasymaldaý jáne saqtaý týraly alty birdeı ákimshilik isti qarady, dep habarlaıdy QazAqparat tilshisi.
«Jelezın aýdandyq soty B., P., L., P., Ý. jáne L. Esimdi azamattarǵa qatysty, QR Ákimshilik quqyq buzýshylyqtar týraly kodeksiniń 482-babynyń («Jeke jáne zańdy tulǵalardyń qarýdy zańsyz ıelenip alýy, berýi, ótkizýi, saqtaýy, alyp júrýi, tasymaldaýy») birinshi bóligine sáıkes alty birdeı ákimshilik isti qarady», - dep málimdedi Pavlodar oblystyq soty.
2017 jyldyń qyrkúıeginde, qazan jáne qarasha aılarynda «Urlytóbe» beketi arqyly QR shekarasynan óterde joǵaryda esimderi atalǵan tulǵalardyń avtomobılderinen 12 kalıbrli patrondar tabylyp, tárkilendi. Olar osy patrondardy ishki ister organdarynyń ruqsatynsyz saqtaǵan, alyp júrgen jáne tasymaldaǵan, ıaǵnı Ákimshilik quqyq buzýshylyq týraly kodekstiń 482-babynyń birinshi bóliginde («Ishki ister organdarynda tirkelmegen tegis uńǵyly, gazdy qarý men olardyń patrondaryn, sol sııaqty elektrli qarýdy, úrlemeli qýaty 7,5 Djoýldan joǵary, kalıbri 4,5 mıllımetrden asatyn pnevmatıkalyq qarýdy zańsyz ıelenip alý, berý, ótkizý, saqtaý, alyp júrý, tasymaldaý») kórsetilgen quqyqbuzýshylyqty jasaǵan.
Biraq ákimshilik ister sotqa 13 naýryzda ǵana kelip túsken, ıaǵnı quqyqbuzýshylyq bolǵannan keıin eki aıdan astam ýaqyt ótken. Sondyqtan ákimshilik jaýapqa tartý merzimi ótip ketken. Ákimshilik kodekstiń 741-babynyń birinshi bóliginiń besinshi tarmaǵyna sáıkes, ákimshilik quqyqbuzýshylyq týraly is qozǵalýy múmkin emes.
Osy faktiler boıynsha Jelezın aýdandyq ІІB bastyǵyna jeke qaýly shyǵaryldy. Sottyń qaýlysy zańdy kúshine áli engen joq.
