Pavlodar oblysynda shaǵyn ındýstrıaldy aımaqtar qurylady
PAVLODAR. QazAqparat - «Investorlar úıinde» ótken keńeıtilgen otyrysta aımaq basshysy Bolat Baqaýov jergilikti jerlerde shaǵyn ındýstrııalyq aımaqtar qurý boıynsha ákimderdiń álsiz jumysyn atap ótip, máseleni jyl sońyna deıin sheshýdi tapsyrdy. Bul týraly QazAqparat pavlodarnews.kz saıtyna silteme jasap.
Ótken jumada ındýstrıaldy damý, shaǵyn jáne orta bıznes máseleleri boıynsha alqa májilisi ótti.
Indýstrııalyq-ınnovatsııalyq damý basqarmasynyń basshysy Ǵanıbet Áýbákirov atap ótkendeı, bıyl Pavlodar oblysynda úsh iri joba júzege asyrylady. Bul «Eýroazıattyq energetıkalyq korporatsııasy» AQ-nyń №5 energobloǵyn iske qosý, «Bogatyr Invest» JShS-da temir-beton buıymdaryn daıyndaýdy qolǵa alý jáne «Pavlodar ózen porty» AQ-da qum blogy óndirisin engizý.
Sonymen qatar, «Pavlodar» arnaıy ekonomıkalyq aımaǵynda jańa kásiporyndar salý jumystary júrgizilýde. Investorlardy qoldaý maqsatynda AEA aýmaǵynda ınfraqurylym tartylýda.
«Bıylǵy jyly arnaıy ekonomıkalyq aımaqta ınjenerlik kommýnıkatsııalardyń qurylysyna 2,2 mıllıard teńge bólindi. Bul, ınfraqurylymǵa qatysty barlyq máselelerdi jabýǵa múmkindik beredi. Jalpy, sońǵy ýaqytta AEA-da jumys jolǵa qoıyldy. Investorlarmen belsendi jumys isteý qajet», - dedi Pavlodar oblysynyń ákimi.
Sondaı-aq, Bolat Baqaýov ákimderge ár qala men aýdanda ınvestorlardy tartý úshin shaǵyn ındýstrııalyq aımaqtar qurý týraly tapsyrma berdi. Aımaq basshysy bılik jumysynyń basty mindeti kásipkerlikti damytý jáne shaǵyn jáne orta bıznestiń ekonomıkalyq belsendiligin arttyrý úshin qolaıly jaǵdaı jasaý bolyp tabylatynyn eske saldy.
