Pavlodar oblysynda shabyndyq alqaptardy órteýshilerge jaza kúsheıtildi
PAVLODAR. QazAqparat – Pavlodar oblysynda shabyndyq alqaptardy órteıtinder anyqtalyp, qatań jazalanatyn bolady, dep habarlaıdy QazAqparat óńir ákimdigine silteme jasap.
Aımaqta dala jáne orman alqaptarynda órttiń jıileýine baılanysty qatań, tipti jerdi tartyp alýǵa deıingi sharalar qabyldanatyn bolady.
«Úlken órt keshe Sharbaqty aýdanynda tirkeldi. Qosqudyq aýlynan bir shaqyrym jerde 1 myń gektar aýmaqta qurǵaq shóp órtene bastady. Aýyldyq jerge órt tóný qaýpi bolǵandyqtan, 14 adamdy evakýatsııalaýǵa týra keldi. Ór sóndirý jumysyna 12 tehnıka men TJ departamentiniń jeke quramynan jáne óz erkimen órt sóndirýge nıet bildirgen 30 sarbaz qatysty», - dedi ákimdikten.
Sońǵy eki aptanyń ishinde Pavlodar oblysynda barlyǵy 100-ge jýyq qýraǵan aǵashtyń órtenýi tirkelgen. Sonyn saldarynan aýyl sharýashylyǵyna paıdalanylatyn 1,5 myń gektarǵa jýyq jer janyp ketti.
Aımaq basshysy Ábylqaıyr Sqaqov máselege jiti nazar aýdaryp, órt qoııýshylardy qatań jazalaýdy tapsyrdy.
«Osyndaı ádeıi órt qoıýshylar tek eldi mekenderge ǵana emes, orman sharýashylyǵyna zııan keltirip, qazirgi TJ kezinde úlken qıyndyqtar týdyrady. Tek sońǵy kúnderi ǵana Pavlodar aýdanynyń Chernoretskıı aýyly men Aqqýly aýdanynyń Qyzylásker aýlynan shyqqan dala órtteri ormanǵa kóship, 30 gektar orman janyp ketti. Biz zań buzǵan jer qoldanýshylaryn qatań jazalap, bul týraly BAQ arqyly kópshilikke jetkize otyryp, jerdi tartyp alý jóninde birqatar sheshimderdi qarastyratyn bolamyz. Tek osylaı ǵana jaǵdaıdy baqylaýda ustaı alamyz», - dep málimdedi oblys ákimi.
Kóktem bastalǵaly Pavlodar oblysynda 77 gektar aýmaqta 5 orman órti tirkeldi. Aýyldyq jerden shyqqan órttiń Memlekettik orman qoryna taralýyna jol bermeý úshin orman kúzeti 38 ret shuǵyl shaqyrtýlarǵa shyqqan.
