Pavlodar oblysynda seńniń ústinde qalǵan 4 balyqshy qutqaryldy
ASTANA. QazAqparat - Bólinip ketken seń muzdyń ústinde qalǵan Pavlodar oblysynyń 4 balyqshysy qutqaryldy, dep habarlaıdy «QazAqparat» QR ІІM TJK silteme jasap.
«21 sáýir kúni saǵat 13.00-de Ekibastuzdaǵy Solnechnyı kentiniń mańynda ornalasqan Shańdyqsor kólinde Pavlodar oblystyq TJD jedel-qutqarý otrıady balyq aýlaý kezinde sýǵa batyp ketken 1967 jyly týǵan balyqshyny izdeý jumystaryn júrgizdi. Sonymen qatar olar muz ústinde qalǵan 4 adamdy qutqardy», - dep jazylǵan habarlamada.
Qutqarylǵan balyqshylar jedel medıtsınalyq qyzmet mamandaryna tapsyryldy. Olarǵa medıtsınalyq kómek asa qajet bolǵan joq.
«Kóktem mezgilindegi jylymyqta muz beti qatty jáne qalyń bolyp kórinedi. Shyn máninde kóktemdegi muz juqaryp, taýsylyp turady. Ol adam salmaǵyn kóterýge de qaýqarsyz. Muzben, jáne muzdy jaǵalaýmen júrmeńizder», - dep málim etti qutqarýshylar.
