Pavlodar oblysynda saılaý barysynda quqyq buzýshylyq tirkelgen joq
Óńirlik kommýnıkatsııalar qyzmeti ótkizgen brıfıngte oblystyq aýmaqtyq saılaý komıssııasynyń tóraǵasy Gúlnár Amanjolova aýyl ákimderi saılaýynyń aldyn ala qorytyndysymen bólisti
« Saǵat 20.00-de Pavlodar oblysynyń 126 saılaý ýchaskesinde daýys berý aıaqtaldy. Atalǵan ýchaskelerde búgin saǵat 7-den bastap baqylaý júrgizildi. 146 senimdi tulǵa boldy. Onyń 103-i saıası partııalardyń atynan shyqqan úmitkerlerden, 43-i ózin-ózi usynǵandardan. Budan bólek, barlyq saıası partııalardan 150 baqylaýshy, túrli qoǵamdyq birlestikterden 340 baqylaýshy qatysty « , - dedi Gúlnár Amanjolova.
Komıssııa tóraǵasynyń aıtýynsha, saǵat 22.00-degi jaǵdaı boıynsha oblysta daýys berýge kelgenderdiń úlesi 76,9 paıyzdy qurady. Bul – 40628 adam.
Oblystyq polıtsııa departamenti bastyǵynyń m. a. Jasqaırat Qaıyrov aýyl ákimderin saılaý barysynda quqyq buzýshylyq tirkelmegenin, ıaǵnı oblysta jaǵdaı turaqty ekenin habarlady.
Eske sala keteıik, 44 aýyldyq deńgeıdegi ákimniń tikeleı saılaýy 130 eldi mekende ótti. Kandıdat bolyp 168 adam usynyldy. Olardyń 59-yn saıası partııalar usynǵan tulǵalar bolsa, qalǵan 109-y – ózin-ózi usynǵandar.
Baıqaýshylar respýblıkalyq «Partııalyq emes baqylaý» qoǵamdyq uıymynyń fılıalynda daıyndyqtan ótken.
Bir adam bir aýdandyq mańyzy bar qalanyń nemese aýyldyń ákimi bolyp eki retten artyq saılana almaıdy. Saılaý ótkizilgennen keıin úsh kún ishinde ótken saılaýdyń qorytyndylary shyǵarylyp, jarııalanady. Jeti kún ishinde aýmaqtyq komıssııa saılanǵan ákimdi tirkep, keıin ol óz ókilettigine ótedi. Ókilettik merzimi – 4 jyl.
Búgin táýelsiz Qazaqstannyń tarıhynda tuńǵysh ret aýyl, kent, aýyldyq okrýg jáne aýdandyq mańyzdaǵy qala ákimderiniń saılaýy ótti.
2021 jyldan bastap aýyl ákimderiniń tikeleı saılaýyn ótkizý týraly Prezıdent Qasym-Jomart Toqaevtyń «Jańa jaǵdaıdaǵy Qazaqstan: is-qımyl kezeńi» atty Joldaýynda tapsyrma berilgen bolatyn.
