Pavlodar oblysynda para alǵandarǵa 11 mln teńge aıyppul salynǵan
ASTANA. QazAqparat - Pavlodar oblysynda 2017 jyldyń basynan beri 13 sybaılas jemqorlyq quqyq buzýshylyq tirkelip, 11 mıllıon teńgege jýyq aıyppul salynǵan, dep habarlaıdy pavlodarnews.kz .
Bul týraly óńirlik kommýnıkatsııalar qyzmetinde «Memleket basshysynyń «Qazaqstannyń úshinshi jańǵyrýy: jahandyq básekege qabilettilik» Joldaýynyń besinshi basymdyǵynyń júzege asyrylýy» atty baspasóz jıynynda QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Pavlodar oblysy boıynsha departament basshysynyń m.a Gúlmıra Qabıeva habarlady.
«13 sybaılas jemqorlyq quqyq buzýshylyq materıalynyń beseýi densaýlyq saqtaý basqarmasynda, segizi tabıǵı monopolııalardy retteý jáne básekelestikti qorǵaý salasynda oryn aldy, - deıdi Gúlmıra Qabıeva. - Nátıjesinde 11 mıllıon teńgege jýyq aıyppul salyndy, sonyń jeti mıllıonǵa jýyǵy tólendi. Іshki saıasat basqarmasy maýsym men shilde kezinde oblystaǵy jemqorlyq deńgeıin anyqtaý úshin áleýmettik zertteý júrgizgen bolatyn. Saraptama qortyndysy boıynsha bılik organdary, TÚKSh, kásiporyn, aýylsharýashylyq, densaýlyq pen bilim salalarynda syıbaılastyq deńgeıi joǵary ekeni anyqtaldy».
Aıta keteıik, oblysta sybaılas jemqorlyqpen qarsy kúres baǵytynda birqatar jobalar iske asýda. Máselen: «Parasyz bolashaqqa birge!», «Esikten esikke», «JOO-dan JOO-ǵa». Sonymen qatar áleýmettik jelilerde #adalbol, #Parasyzbolashaqqabirge heshtegterimen beınematerıaldar jarııalanýda.
