Pavlodar oblysynda ótken jyly tórt aýyl men 131 kósheniń ataýy ózgertildi
ASTANA. QazAqparat - 2016 jyly Pavlodar oblysynda tórt aýyl men 131 kósheniń ataýy qazaqshalanǵan, dep habarlaıdy pavlodarnews.kz.
Bul týraly aımaq basshysy Bolat Baqaýov byltyrǵy jylǵy jumys qortyndysy boıynsha turǵyndar aldynda esep berý jıynynda habarlady.
-Óńirimizde til saıasatyndaǵy jumystar da jyl saıyn óris alyp keledi. Onyń ishinde onomastıka salasyndaǵy jumystardy ataýǵa bolady. Máselen, Pavlodar oblysynda sońǵy 25 jyldyń ishinde 86 eldi mekenniń, 544 kósheniń ataýy ózgertildi. Onyń ishinde tórt aýyl men 131 kóshe 2016 jyly onomastıka komıssııasynda qaralyp, oń sheshimin tapty, - dedi oblys ákimi.
Bolat Baqaýov mundaı belsendi jumys oblys boıynsha onomastıka tarıhynda buryn-sońdy bolmaǵanyn atap ótti.
