Pavlodar oblysynda otbasynyń shyrqyn buzǵan 100-den astam adam jazalandy
PAVLODAR. QazAqparat - Pavlodar oblysynda 12-15 aqpan aralyǵynda «Turmys» jedel-profılaktıkalyq is-sharasyn ótkizý barysynda janjal shyǵarǵan 106 adam ákimshilik jaýapkershilikke tartyldy, dep habarlaıdy pavlodarnews.kz.
Bul týraly oblystyq polıtsııa departamentiniń baspasóz qyzmeti málim etti.
«Mas kúıinde jáne buryn sottalǵandarmen jasalatyn quqyq buzýshylyqtardyń aldyn alý maqsatynda polıtsııa qyzmetkerleri jıi spırttik ishimdikter ishý, quqyqqa qaıshy áreketter jasaý, tynyshtyqty buzý boıynsha túsken shaqyrýlarǵa qatysty 98 páter men 54 jataqhanany tekserdi», - deıdi baspasóz qyzmetinde.
Úsh kúnniń ishinde turǵylyqty mekenjaıy boıynsha esepte turǵan 2913 adam men 428 jaldamaly páterge baqylaý júrgizildi. Nátıjesinde 203 qorǵaý uıǵarymy shyǵarylyp, quqyq buzýshylarǵa 29 erekshe talap qoıyldy. Sondaı-aq, 12 adamǵa alkogoldik ishimdikterdi tutynýǵa tyıym salyndy. QR ÁQBK-niń 73-baby (otbasylyq-turmystyq qatynastar salasynda quqyqqa qaıshy áreket jasaý) boıynsha 106 otbasylyq janjalqor, qorǵaý uıǵarymyn buzǵany úshin QR ÁQBK-niń 461-babyna sáıkes 17 adam jaýapkershilikke tartyldy.
