Pavlodar oblysynda otbasy bir kúnde bes balany baýyryna basty
ASTANA. QazAqparat - Pavlodar oblysy Ýspen balalar úıinen bes balany qamqorlyǵyna alǵan Vadım Moroz ben Tamara Moroz bir kúnde kóp balaly otbasy atandy.
Oblystyq bilim berý basqarmasy málim etkendeı, Moroz otbasysyna 15 jastaǵy Tatıana, 12 jastaǵy Valentına, 10 jastaǵy Gennadıı, 7 jastaǵy Klavdııa jáne 5 jastaǵy Aleksandra qosyldy. Bul balalar bir januıadan shyqqan, dep habarlaıdy pavlodarnews.kz .
«Birinshi kúnnen-aq balalar bir-birine baýyr basyp ketti. Qujattardy rásimdegenge deıin demalystarda jáne mereke kúnderi kezdesip turdyq. Olar óte jaqsy, meıirimdi, sypaıy. Biz óz tarapymyzdan barynsha mahabbatymyzdy syılap, olardyń armandaryn júzege asyra alǵanymyzǵa óte qýanyshtymyz», - dedi Tamara Mıhaılovna.
Aıta keteıik, Tamara Mıhaılovna kóp ýaqyt boıy balalar úıinde tárbıeshi bolǵan. Vadım Moroz «Kırova» JShS-nde mehanık bolyp jumys isteıdi. Otbasyna qabyldanǵan jalǵyz er bala Genadııge aldaǵy ýaqytta sharýashylyqty júrgizýge úıretýdi josparlap otyr. «Qabyldaýshy otbasy - bul jetim balalar jáne ata-anasynyń qamqorlyǵynsyz qalǵan balalarǵa arnalǵan bilim berý uıymdarynan 4-ten 10 jasqa deıingi balalardy qabyldaıtyn tolyq otbasy. Qabyldaýshy ata-analardyń ekeýine de aqshalaı qarajat tóleý qarastyrylǵan. Azamattardy óz otbasynda tárbıeleýge qabyldaýǵa qoryqpaýǵa shaqyramyz. Memlekettik mekemelerde balalardyń jaǵdaılary qanshalyqty jaqsy bolǵanymen otbasy jylýynyń ornyn toltyra almaıdy», - deıdi bilim basqarmasy basshysynyń orynbasary Ernur Dáýenov.
Eske sala keteıik, bul - Pavlodar oblysynda qurylǵan ekinshi qabyldaýshy otbasy. Barlyq ata-analar pedagogtar bolyp tabylatynyn atap ótken jón. Jaqyn arada Mıchýrın balalar úıinen taǵy tórt bala Kachır aýdanynyń qabyldaýshy otbasyna beriletin bolady.
