Pavlodar oblysynda órtten keıin barlyq mektepter tekseriledi

PAVLODAR. QazAqparat - Ertis aýdanynyń Ertis aýylyndaǵy № 3 orta mektepte bolǵan órtten keıin oblystaǵy barlyq oqý ornynda órtke qarsy qaýipsizdik tekseriledi, dep habarlaıdy QazAqparat pavlodarnews.kz silteme jasap.

Bul týraly óńirlik bilim berý basqarmasynyń basshysy Dinıslam Bolathanuly Feısbýktegi paraqshasynda jarııalady.

«Oqys jaǵdaı oryn alǵannan keıin barlyq oqý ornyn tekserý usynyldy. Mundaı jaıttyń qaıtalanýyna jol bermeý qajet. Sondaı-aq, bilim berý mekemeleriniń basshylaryna balalardyń qaýipsizdigi úshin qyzmetkerlerdiń jaýapty ekenin eske salǵym keledi. Qazirgi tańda elektr jelileri tekserilýde. Ekinshi aýysymdaǵy oqýshylar úshin sabaq bolmady. Dúısenbi kúni eki aýysymda da sabaq ótkiziledi», - deıdi Dinıslam Bolathanuly.

Eske sala keteıik, órt qosalqy ǵımaratta elektr symdarynyń tuıyqtalýy saldarynan shyqqan. Bul shaǵyn bólmede tehnıkalyq qyzmetkerler kıim aýystyrady. Mektep ákimshiligi dereý áreket etip, órt sóndirýshiler kelgenge deıin mekteptegi barlyq 219 adamdy syrtqa shyǵaryp úlgergen. Onyń ishinde 187-si bala, 23-i pedagog jáne toǵyzy - tehnıkalyq qyzmetker. Abyroı bolǵanda, barlyǵy din aman.

Qyzyl jalyn 25 sharshy metr aýmaqty sharpyǵan. Saǵat 11.30-da bastalǵan tilsiz jaý 15 mınýttyń ishinde tolyǵymen sóndirildi.