Pavlodar oblysynda órt sóndirýshiler jańa ǵımaratqa kóshti
PAVLODAR. QazAqparat – Pavlodar oblysy Aqtoǵaı aýdanynyń burynǵy veterınarlyq stantsııasynyń ǵımaratyna aýdandyq Tótenshe jaǵdaılar bólimi men «Órt sóndirý qyzmeti jáne avarııalyq-qutqarý jumystary qyzmeti» MM-iń №15 órt sóndirý bólimi ornalasty.
Bul týraly QazAqparat Pavlodar oblysy Tótenshe jaǵdaılar departamentiniń baspasóz qyzmetine silteme jasap.
Pavlodar oblysynyń ákimi Ábilqaıyr Sqaqov tótenshelikterdi jańa ǵımaratqa kóshýimen quttyqtap, jańa kólikterdiń kiltterin tapsyrdy.
Aımaq basshysy jergilikti atqarýshy organdar tarapynan aýdan ortalyqtaryndaǵy órt sóndirý beketteriniń materıaldyq-tehnıkalyq jaǵdaıyn nyǵaıtýǵa edáýir kóńil bólingenin atap ótti.
«Memleket basshysy Qasym-Jomart Toqaev jeke sheshim qabyldap, Tótenshe jaǵdaı mınıstrligi qurylǵan edi. Jańa nysan órt sóndirýshilerdiń qyzmetin edáýir jeńildetip, olardyń jumysyna tyń serpin beredi dep oılaımyn.», - dedi Ábilqaıyr Sqaqov.
Pavlodar oblysy Tótenshe jaǵdaılar departamentiniń bastyǵy Ernur Ótegenov óziniń quttyqtaý sózinde Aqtoǵaı aýdanynyń aýmaǵynda tehnogendik jáne tabıǵı apattardyń barlyq túri bolyp turatynyn atap ótti. Ol oblys basshylyǵyna órt sóndirý deposynyń rekonstrýktsııasyna qoldaý kórsetkeni úshin alǵys bildirdi.
«Bul Tótenshe jaǵdaı mınıstrligi qurylǵannan beri respýblıka boıynsha jańa ǵımaratqa kóshken alǵashqy órt sóndirý beketi. Aýdandyq garnızonnyń jeke quramyna jaýapty qyzmetterine sáttilik pen tabys tileımin», - dedi Ernur Ótegenov.
Burynǵy veterınarlyq stantsııanyń ǵımaratyn jóndeý jáne aýmaqty abattandyrý jumystaryna jergilikti bıýdjetten 60 mıllıonǵa jýyq qarajat jumsaldy.
Órt sóndirýshilerge arnalǵan «Ýral» avtotsısternasy respýblıkalyq qazynadan bólingen 38 mıllıon 800 myń teńgege satyp alyndy. Aýdandyq Tótenshe jaǵdaı bólimi úshin oblystyq bıýdjetten bólingen qarajatqa VAZ-2121 avtokóligi satyp alyndy. Jańa kóliktiń quny 5 mıllıon 987 myń teńgeni quraıdy.
Rekonstrýktsııa júrgizilgen ǵımarattarda órt sóndirý jáne qyzmettik kólikterge arnalǵan 4 boks, qyzmetkerlerdiń tórt kabıneti, ashana, oqý synyby, sport zaly, muraǵat bólmesi, arnaıy quraldardy qoıatyn jaı, dıspetcherlik baılanys toraby ornalasqan.
