Pavlodar oblysynda órt sóndirý kezinde TJM qyzmetkeri qaza tapty
NUR-SULTAN. QazAqparat - Pavlodar oblysy Aqsý qalasynyń Aqsý shaǵyn aýdanynda órt sóndirýshi qyzmettik mindetin atqarý kezinde qaza tapty, dep habarlaıdy QR TJM resmı ókili Talǵat Ýálı.
«2021 jyldyń 25 aqpanynda saǵat 7:46-da Pavlodar oblysy Aqsý qalasynyń Aqsý shaǵyn aýdanynda órt oryn alǵandyǵy týraly habarlama tústi. Tórt bólmeli turǵyn úıde jalpy aýdany 80 sharshy metr órt sharpyǵan. Órt saǵat 10.16-da oqshaýlandy, saǵat 11.00-de tolyǵymen sóndirilgen. Órt sóndirýshiler qyzyl jalynmen kúresip jatqanda 1997 jyly týǵan Aqsý qalasy № 12 órt sóndirý beketi bólimshesiniń komandıri, azamattyq qorǵaý serjanty Arystanbek Mashraptyń jaǵdaıy nasharlaǵan» delingen habarlamada.
Málimetke saı, ol Aqsý aýyldyq dárigerlik ambýlatorııasyna es-tússiz kúıde jetkizilgen. Keıin dárgerler onyń qaıtys bolǵandyǵyn habarlady. Oqıǵanyń mán-jaıy anyqtalýda.
«Sonymen qatar 1995 jyly týǵan № 12 órt sóndirý beketi bólimshesiniń komandıri azamattyq qorǵaý kishi serjanty Ermek Turlybekov aýrýhanaǵa jetkizilip, Pavlodar qalasynyń aýrýhanasyna jatqyzyldy. Qaıtys bolǵan Arystanbek Mashrap azamattyq qorǵaý organdarynda 2018 jyldan bastap qyzmet atqardy. Pavlodar qalasynyń týmasy, úılengen» dep málimdedi vedomstvodan.
QR TJ mınıstrliginiń ujymy órt sóndirýshiniń mezgilsiz qaıtys bolýyna baılanysty marqumnyń jaqyndary men týystaryna kóńil aıtady.
Aıta keteıik, 1991-2021 jyldary aralyǵynda qyzmettik mindetterin oryndaý kezinde azamattyq qorǵaý organdarynyń 53 qyzmetkeri qaıtys bolǵan.
