Pavlodar oblysynda orman tálimbaǵy qaıta ashylady
PAVLODAR. QazAqparat - Pavlodar oblysynda orman tálimbaǵy qaıta ashylady. Ol qala aýmaǵyn kógaldandyrý úshin jyl saıyn óńirge 12 mln-ǵa jýyq kóshet jetkize alady degen boljam bar, dep habarlaıdy Pavlodarnews.kz tilshisi.
Bul joba týraly oblystyq ákimdikte ótken ekologııalyq keńestiń otyrysynda belgili boldy.
«Biz turaqty orman tálimbaǵyn 1990 jyldan beri jumys istemeıtin bazada salamyz , - dedi oblystyń jer qoınaýyn paıdalaný, qorshaǵan orta jáne sý resýrstary basqarmasynyń basshysy Qadyljan Sátıev. - Onyń aýdany 91 gektardan asady. Pavlodar aýylynda ornalasqan. Biz bul tálimbaqty qaıta jandandyrýdy josparlap otyrmyz. Joba burynnan ázirlengen, biraq qazir qosymsha túzetýlerdi talap etedi. Tálimbaq jyl saıyn bizdiń orman qorǵaý mekemelerine 12 mln-ǵa jýyq kóshet jetkizýge múmkindik beredi. Osylaısha, biz úsh orman sharýashylyǵynyń otyrǵyzý materıalyna qajettiligin jaba alamyz».
Oblys ákimi Ábilqaıyr Sqaqovtyń aıtýynsha, turǵyn úı jáne jol qurylysy kezinde kesilgen aǵashtardy óteý úshin kóshetter árdaıym qajet bolady.
«Tálimbaq turaqty bolýy kerek. Óıtkeni kógaldandyrý máselesine júıeli túrde qaraý kerek», - dep atap ótti oblys ákimi.
Osy otyrysta Pavlodar, Ekibastuz jáne Aqsý qalalarynda jańa jasyl jelekterdi otyrǵyzý boıynsha keshendi jospar usynyldy.
Jer qoınaýyn paıdalaný basqarmasynyń basshysy jobanyń birden úsh baǵyty bar ekenin atap ótti. Bul - memlekettik orman qoryn, sanıtarlyq-qorǵaý aımaqtaryn, sondaı-aq eldi mekender ishindegi saıabaqtar, skverler men kóshelerdi kógaldandyrý.
Spıkerdiń aıtýynsha, memlekettik qordyń jalpy aýdany qazir 478 myń gektardy quraıdy, onyń 267,5 myńy ormanmen qamtylǵan. Otyrǵyzý josparyna sáıkes, bes jyl ishinde 19 myń gektardan astam aýmaqqa 95 mıllıonnan astam jasyl ekpe otyrǵyzý arqyly bul aýmaqty jeti paıyzǵa ulǵaıtý josparlanýda. Onyń ishinde qaraǵaı kóshetterin Baıanaýyl ulttyq parki men «Ertis Ormany» tabıǵı rezervaty jetkizetin bolady.
Sonymen qatar, qalalar men aýdan ortalyqtarynyń ákimdikteri bıyl 102 myńnan astam kóshet otyrǵyzýy kerek, onyń 40 myńy úsh qalaǵa tıesili.
Pavlodarda tórt saıabaq pen skver kógaldandyrylady, sondaı – aq kóshetter jańa jaǵalaýda - «Qaz qonaq» eskertkishinen bastap temirjol kópirine deıin jáne oblys ortalyǵynyń iri kósheleri boıynda paıda bolady.
Ekibastuz ben Aqsý qalalarynda jas aǵashtar avtojoldardyń boıynda, skverler men áleýmettik nysandardyń janynda paıda bolady.
Sonymen qatar, Pavlodar oblysy 24 sáýirden bastap «Taza tabıǵat» respýblıkalyq ekologııalyq jobasyna qosylady. Aktsııa aıasynda Qazaqstan óńirlerinde úsh mıllıardqa jýyq aǵash pen buta kóshetterin otyrǵyzý josparlanýda.
Joba kógaldandyrýdy ǵana emes, sonymen qatar sý qoımalary men bulaqtardy tazartýdy da qamtıdy.
Respýblıkalyq aktsııa aıasynda Pavlodar oblysynda 12 myń aǵash pen buta egiledi: qaıyń, qaraǵash, sheten, sibir shyrshasy, qaraǵaı jáne pıramıdalyq terek.
Qatysýshylar volonterler, qoǵamdyq uıymdardyń ókilderi, ekoaktıvıster, memlekettik qyzmetkerler, oqýshylar, stýdentter jáne kásiporyn qyzmetkerleri bolady.
