Pavlodar oblysynda orman órtteri kóbeıgen
«Órt shalǵan aýmaqtyń kólemi – 878,6 gektar, al ormandy jerlerdiń aýmaǵy – 252,7 gektar. Onyń 15 jaǵdaıynda órt dala órtinen kelgen edi. Sondaı-aq, naızaǵaı razrıadynan, otty abaısyz qoldaný sebepterinen órt shyqqan jaǵdaılar da bar», - dedi óńirlik kommýnıkatsııalar qyzmetinde ótken baspasóz konferentsııasynda oblystyq orman sharýashylyǵy jáne janýarlar dúnıesi aýmaqtyq ınspektsııasynyń basshysy Rýslan Tólepbaev.
Aıtýynsha, byltyrǵy jylmen salystyrǵanda órt jaǵdaıy 10-ǵa artyq. Jyl saıyn kóktem mezgilinde TJD men orman sharýashylyǵy ınspektsııasy birlesip, tabıǵatty qorǵaý mekemeleriniń órt qaýipti maýsymyna daıyndyǵyn tekseredi.
«Bıylǵy tekserýdiń nátıjesi boıynsha qanaǵattanarlyq jaǵdaıda degen baǵa berilgen bolatyn. Orman sharýashylyǵy mekemelerinde materıaldyq-tehnıkalyq jabdyqtaýdyń deńgeıi 60-75% aspaıdy. Qoldanystaǵy órt sóndirý mashınalarynyń tozyǵy jetken, 30% qoldanystan shyǵarý kerek. Ol úshin jyl saıyn qarajat quıyp, materıaldyq tehnıkalyq jaǵdaıdy kúsheıtý qajet», - deıdi Rýslan Tólepbaev.
Spıkerdiń aıtýynsha, orman qorǵaý mekemelerinde 43 órt sóndirý mashına, 59 traktor, 29 shaǵyn orman patrýldik kesheni bar. Byltyr «Ertis ormany» rezervatyna 14 traktor jáne bir dron satyp alynǵan.
«Bıyl qosymsha jabdyqtaý úshin 800 mln teńge bólingen bolatyn. Bul qarajatqa «Ertis ormany» rezervatyna 5 órt sóndirý mashına, al úsh orman qorǵaý mekemelerinde úsh traktor jáne Baıanaýyl aýdanyndaǵy ulttyq tabıǵı parkine eki traktor men shaǵyn orman patrýldik keshen satyp alý josparlanyp otyr», - dedi ol.
Sondaı-aq, «Ertis ormany» mekemesindegi ormanshylyqtarda 16 baqylaý beketi bar, qaýipti órt maýsymynda rezervattyń qaýiptiligi joǵary jerlerinde qosymsha 9 órtke qarsy beket qoıyldy. Al, Baıanaýyl ulttyq tabıǵı parkinde 12 baqylaý beketi bar.