Pavlodar oblysynda oralmandar men qonys aýdarýshylarǵa 462 kvota bólingen

ASTANA. QazAqparat - 2018 jyly Pavlodar oblysyna oralmandar men qonys aýdarýshylardy qabyldaýǵa bólingen kvota nátıjesinde 462 otbasy nemese 1851 adam qonys aýdarady. Bul týraly oblystyq ákimdikte ótken jıyn barysynda óńirlik jumyspen qamtý jáne áleýmettik baǵdarlamalar basqarmasy basshysynyń orynbasary Helýa Qashkenova aıtty, dep habarlaıdy pavlodarnews.kz .

- Árıne, bul biz josparlaǵannan áldeqaıda az, - deıdi Helýa Qashkenova. "Óńir boıynsha kelesi jyly árbir qala men aýdanǵa 40 otbasynan kelý kerek. Sondyqtan qazirden bastap eńbek kúshi artyq aımaqtarda aýyldyq eldi mekenderdegi bos jumys oryndary týraly aqparattyq-túsindirý jumystaryn júrgizip, jyldyń sońyna deıin qonys aýdarashylardyń tizimin qalyptastyrý kerek. Qarasha jáne jeltoqsan aılarynda halyqtyń qonys aýdarýǵa daıyn bolýy úshin sol óńirlerge baryp, bos jumys oryndary jármeńkesin uıymdastyrý týraly usynys bar". 

 Spıkerdiń aıtýynsha, bıyl jyl basynan beri oralmandardy qabyldaý óńirlik kvotasyna 26 otbasy nemese 86 etnıkalyq qazaq engizilgen. Búgingi tańda komıssııanyń bólýi úshin on bes otbasynyń qujattary daıyndalǵan jáne qosymsha toǵyz otbasyn qosý josparlanyp otyr. "Jyl basynda 100 otbasy nemese 500 adam bolǵan. Biz mınıstrlikke oralmandarǵa beriletin kvota sanyn elýge deıin qysqartý týraly ótinishpen júgindik. Degenmen sheshim qarasha aıynda belgili bolady. Sondyqtan oblys boıynsha oralmandar kvotasy elýge deıin qysqartylady. Tym bolmaǵanda osy kórsetkishti oryndaý úshin taǵy toǵyz otbasyna qujattar daıyndaý kerek. Óńirlik qonys aýdarýshylar kvotasyna 50 otbasy nemese 231 ishki mıgrant engizilip, bul baǵytta jumys tolyǵymen oryndalǵan. Jalpy, 50 otbasyn nemese 250 adamdy kóshirý josparlanǵan bolatyn. Nátıjesinde mınıstrlikke únemdelip qalǵan qarajatqa kvota sanyn 60-qa deıin arttyrý týraly bıýdjettik ótinish jiberdik. Qazirgi kúni qalalar men aýdandarda jeti adamǵa qujattar daıyn", - deıdi Helýa Qashkenova.