Pavlodar oblysynda omyrtqa aýrýlaryn emdeıtin elimizdegi alǵashqy ortalyq ashyldy
ASTANA. QazAqparat - Pavlodar oblysy Maı aýdanynda omyrtqa aýrýlaryn emdeıtin elimizdegi alǵashqy memlekettik ortalyq ashyldy, dep habarlaıdy pavlodarnews.kz.
Ortalyqta bir mezette 30 adam emdele alady. Ortalyq omyrtqa aýrýlaryna shaldyqqan jáne túrli jaraqattan keıin tirek-qımyl apparaty buzylǵan adamdardy ońaltýǵa baǵyttalǵan. Bul maqsatta oblystyq bıýdjetten 50 mıllıon teńge bólingen. Maı aýdanynda jumys saparymen bolǵan oblys ákimi Bolat Baqaýov ortalyqtyń ashylýynyń arqasynda 40 adam jumyspen qamtylǵanyn tilge tıek etti.
«Ortalyqqa kelgen naýqastar osynda tájirıbesimen bólisip, bir-birine keńes bere alady, - dedi óńir basshysy. - Oblys turǵyndarynyń 3 paıyzy - múmkindigi shekteýli jandar. Ortalyqtyń ashylýy jáne mamandardyń kómegimen ońaltý jumystary oń nátıje beredi degen oıdamyn». Pavlodar oblysy múgedekter qoǵamynyń tóraǵasy Georgıı Chetverıkovtyń aıtýynsha, eger buryn naýqastar tek qana 10 kúndik ońaltýdan tegin ótse, ortalyqtyń paıda bolýymen bul merzim 45 kúnge deıin sozylady.
«Bizdiń ortalyq týraly Qazaqstannyń basqa da óńirleri bile bastady, - dedi Georgıı Chetverıkov. - Ǵımarattyń ishi óte jyly jáne jaryq. Qasynda Ertis ózeni aǵyp jatyr. Mekemeniń bolashaǵy zor».
Aıta keterligi, munda arnaıy reabılıtolog maman naýqastarǵa birinshi kezekte ózine-ózi kómek kórsetýdi, ekinshiden, ózine jáne aınaladaǵylarǵa paıdasyn tıgizýdi jáne qoǵamǵa beıimdelýdi úıretedi. Sondaı-aq, sý asty massaj, tranejer zaly jáne emdik dene tárbıesi qarastyrylǵan. Nysan 2009 jyly ashylǵan aýdandyq ortalyq aýrýhananyń ishinde 1500 sharshy metr aýmaqta ornalasqan.
