Pavlodar oblysynda oqýshyny aldaǵan muǵalim zańǵa tartyldy
ASTANA. QazAqparat - Pavlodar oblysynyń Ekibastuz qalasynda 11 synyp oqýshysynyń altyn buıymdaryn aldap, alyp alǵan fızıka pániniń muǵalimine qatysty tergeý bastaldy, dep habarlaıdy «QazAqparat» HAA tilshisi Pavlodar oblysynyń ІІD baspasóz qyzmetine silteme jasap.
Vedomstvonyń habarlaýynsha, Ekibastuz qalasyndaǵy mektepterdiń birinde fızıka pániniń muǵalimine qatysty QR QK-niń 190-baby (alaıaqtyq) boıynsha sotqa deıingi tergeý amaldary júrgizilip jatyr.
«Kúdikti 11 synyp oqýshysynyń senimine kire otyryp, anasynyń syrqattanyp qalǵanyn aıtyp, onyń altyn buıymdaryn surap alǵan. Altyn qolyna túskennen keıin ol buıymdardy lombardqa ótkizip, qaltasyna 240 myń teńge túsirgen», - dep habarlaıdy ІІD baspasóz qyzmetinen.
Oqýshy birneshe ret altynyn qaıtaryp alý týraly muǵalimge ótinish bildirgenimen, qaıtara almapty. Aqyry, bul jaǵdaı týraly Instagram-daǵy paraqshasyna jazǵan. Qazirgi ýaqytta barlyq altyn buıymdar oqýshyǵa qaıtarylyp, alaıaq muǵalim zań aldynda jaýap beretin boldy.
