Pavlodar oblysynda múgedektigi bar 3,3 myńnan astam saılaýshynyń daýys berýine jaǵdaı jasalady

PAVLODAR. QazAqparat – Pavlodar oblysynda múgedektigi bar 3,3 myńnan astam saılaýshynyń daýys berýine jaǵdaı jasalady. Bul týraly óńirde QR Ortalyq saılaý komıssııasy tóraǵasynyń orynbasary Konstantın Petrovtyń qatysýymen ótken kóshpeli semınar-keńeste aıtyldy, dep habarlaıdy QazAqparat OSK saıtyna silteme jasap.

Pavlodar oblysy ákimi apparatynyń basshysy D. Ibraev oblys boıynsha barlyǵy 510 847 azamat saılaýshylar tizimderine engizilgenin habarlady. 30 qazanda saılaýshylardyń tizimderi saılaý ýchaskelerine berildi, 4 qarashadan bastap tizimder azamattarǵa tanysýǵa usynyldy.

Oblysta barlyǵy 528 saılaý ýchaskesi bar, onyń 21-i qoljetimdiligi shekteýli. Qalalar men aýdandar ákimdikteriniń derekteri boıynsha barlyq saılaý ýchaskelerinde daýys berýge arnalǵan úı-jaılar Ortalyq saılaý komıssııasynyń nusqaýlyǵyna sáıkes jaraqtandyrylǵan. Budan basqa, Tótenshe jaǵdaılar organdary ǵımarattardyń tehnıkalyq jaraqtandyrylýyna tekserý júrgizdi.

Saılaý ýchaskesin naqtylaýǵa yńǵaıly bolý úshin @prezident_sailau_2022_pvl_bot telegram-botynda JSN boıynsha izdeý servısi arqyly saılaý ýchaskesi týraly aqparatty izdeý servısteri jumys isteıdi. Servıster saılaý ýchaskesi, saılaý ýchaskesiniń nómiri, mekenjaıy, baılanystary týraly aqparat alýǵa múmkindik beredi. Barlyq 13 ákimdikte Call-ortalyqtar qarastyrylǵan. Sonymen qatar, saılaýshylar úshin 109 biryńǵaı baılanys ortalyǵy bazasynda call-ortalyq jumys isteıdi.

Pavlodar oblysynyń jumyspen qamtýdy úılestirý jáne áleýmettik baǵdarlamalar basqarmasynyń basshysy A. Dısıýpova oblys boıynsha daýys berý kezinde erekshe jaǵdaılarǵa muqtaj múgedektigi bar 3,3 myńnan astam saılaýshy bar ekenin habarlady. Osyǵan baılanysty oblysta múmkindigi shekteýli azamattardyń saılaý ýchaskelerine kedergisiz kirýi úshin jaǵdaı jasaý boıynsha barlyq qajetti sharalar qabyldanyp jatyr. Barlyq saılaý ýchaskeleri ǵımarattardyń birinshi qabattarynda ornalasqan. Kreslo-arbalardy paıdalanatyn múgedektigi bar adamdardyń daýys berýi úshin saılaý jáshikteri men kabınalaryn qoljetimdi deńgeıde ornalastyrý kózdelgen. Múgedektigi bar adamdar úshin 488 ýchaskede buryshtar uıymdastyryldy, 522 ýchaske kabınalarmen jabdyqtaldy, 5 sýrdoaýdarmashyny tartý josparlanyp otyr. Sonymen qatar, daýys berý kúni 18 «ınvataksı» qyzmeti usynylatyn bolady. Múgedektigi bar adamdardyń saılaý quqyqtaryn iske asyrý úshin saılaý ýchaskelerine bara almaıtyn múgedektigi bar adamdarǵa daýys berýge arnalǵan tasymaldanatyn jáshigi bar kóshpeli komıssııalar uıymdastyrylady.