Pavlodar oblysynda mektep dırektorlary keń kabınetterinen aıyryldy
NUR-SULTAN. QazAqparat - Pavlodar oblysynda 31 orta mekteptiń dırektory arnaıy demalýǵa arnalǵan bólmesi bar kabınetterinen bas tartty. Bul týraly búgin Pavlodar oblysy ákiminiń orynbasary Meıram Begentaev aıtty, dep habarlaıdy QazAqparat tilshisi.
QR Memlekettik qyzmet isteri jáne sybaılas jemqorlyqqa qarsy is-qımyl agenttigi alańynda ótken baspasóz máslıhatynda ol Pavlodar oblysynda «Adaldyq alańy» jobasy júrgizilip jatqandyǵyn aıtty.
«Jobalyq keńse mekep dırektorlary kabınetiniń alańy men ornalasýynyń normalarǵa saı ekendigine monıtorıng júrgizdi. Bizde 347 bilim berý mekemesi bolsa, sonyń ishinde 31 dırektordyń kabınetinde demalýǵa arnalǵan arnaıy bólme bolǵan», - dedi oblys ákiminiń orynbasary.
Sonymen qatar, onyń aıtýynsha, monıtorıng barysynda 88 mektep dırektorynyń kabınetteri ǵımarattyń ekinshi jáne úshinshi qabatynda ornalasqany anyqtalǵan.
«Jobalyq keńse atalǵan mektepterge kelýshilerge qolaıly jaǵdaı jasaý maqsatynda kabınetterdi birinshi qabatqa kóshirý týraly keńes berdi. Búgingi kúni 40-tan astam mekteptiń dırektory tómengi qabatqa kóshti», - dedi Meıram Begentaev.
Onyń dereginshe, mektep dırektorlarynyń bosaǵan kabınetterinde robototehnıka, kórkem eńbek, balalar psıhologııasy syndy kabınetter ashylǵan.
