Pavlodar oblysynda medıtsınalyq tekseristen ýaqytynda ótpegen 44 adam jumystan shettetildi
ASTANA. QazAqparat - Bıyl Pavlodar oblysynda tamaqtan ýlaný oqıǵalaryn, ishek ınfektsıalarynyń taralýyn aldyn alý maqsatynda medıtsınalyq tekseristen ýaqytynda ótpegen jáne jumys isteýge medıtsınalyq ruqsaty joq 44 tulǵa jumystan shettetildi.
Bul týraly óńirlik kommýnıkatsııalar qyzmetinde ótken baspasóz máslıhatynda oblystyq qoǵamdyq densaýlyq saqtaý departamentiniń basshysy, óńirdiń bas memlekettik sanıtarııalyq dárigeri Irına Sorokına málim etti, dep habarlaıdy pavlodarnews.kz .
«2017 jyldyń eseptik kezeńinde Pavlodar oblysyndaǵy qoǵamdyq jáne balalar tamaqtanatyn oryndarda jappaı ýlaný faktileri oryn alǵan joq», - deıdi Irına Sorokına.
Salmonellezge shaldyǵý boıynsha kórsetkish 32,7 paıyzǵa, naqtylanbaǵan etıologııa boıynsha bakterııalyq, vırýstyq, ishek ınfektsııalary 74 paıyzǵa, naqtylanǵan etıologııa boıynsha ózge ishek ınfektsııalarynyń taralýy 7,7 paıyzǵa azaıǵan.
Bas memlekettik sanıtarııalyq dárigerdiń aıtýynsha, 2017 jyldyń birinshi jarty jyldyǵynda azyq-túlik ónimderiniń qaýipsizdigin baqylaý aıasynda júrgizilgen monıtorıng nátıjesinde 273 saýda núktesinen alynǵan 1079 synamanyń 51-i talapqa saı kelmegen. Bul zerttelgen óniminiń 4,7 paıyzyn quraıdy. Kóptegen jaǵdaıda sút ónimderi (8,2 paıyz) men et ónimderi (5,7 paıyz) normaǵa sáıkes bolmaı shyqqan. Sonymen qatar tekseris barysynda ónimderdiń saqtalý merzimi, daıyn ónimdi saýdalaý úshin tıisti jaǵdaıdyń jasalmaýy, medıtsınalyq tekseris pen ruqsattyń bolmaýy sııaqty olqylyqtar jıi kezdesken.
Aıta keterligi, departament pen onyń aýmaqtyq qurylymdary 225 azyq-túlik óndirisi, 627 qoǵamdyq tamaqtaný jáne 2051 saýda salasynyń nysanyna baqylaý júrgizedi.
