Pavlodar oblysynda medıtsına uıymdarynyń kredıtorlyq bereshegi 3 mlrd teńgege jýyqtady

ASTANA. QazAqparat – Pavlodar oblysyndaǵy aýrýhanalardyń qaryzy kúnnen-kúnge artyp keledi. Buǵan medıtsınalyq uıymdardyń tolyq qarjylandyrylmaı otyrǵany sebep. Senator Ernur Áıtkenov atalǵan máseleni óziniń depýtattyq saýalynda kóterdi, dep habarlaıdy QazAqparat tilshisi.

Onyń aıtýynsha, bul másele Densaýlyq saqtaý mınıstrliginiń aralasýynsyz sheshilmeıdi.

Senatordyń paıymynsha, statsıonarlyq kómek kórsetetin medıtsına uıymdary qyzmetkerleriniń eńbekaqy qorynyń ortasha ósimi 21-den 25 paıyzǵa deıin bolsa, bazalyq tarıf orta eseppen 11,4 paıyzǵa ǵana kóterildi.

«2023 jylǵa arnalǵan qarjylandyrýǵa taldaý jasalyp, bólingen qarajattyń jyldyq jalaqynyń 100 paıyzyna jetetinin kórsetti. Ózge shyǵyndar, ıaǵnı kommýnaldyq tólemder, baılanys qyzmetteri, basqa da satyp alýlar men qyzmetter jetkiliksiz qarjylandyrylǵan. Sonymen qatar byltyrdan bastap Pavlodar oblysynda halyqqa statsıonarlyq kómek kórsetetin medıtsınalyq uıymdar úshin naqty kórsetilgen medıtsınalyq qyzmetterdi jetkiliksiz qarjylandyrýǵa baılanysty kúrdeli jaǵdaı qalyptasyp otyr. Nátıjesinde 2023 jylǵy 1 qańtardaǵy jaǵdaı boıynsha medıtsına uıymdarynyń kredıtorlyq bereshegi 2 mlrd 825,5 mln teńgeni qurady», - dedi senator Densaýlyq saqtaý mınıstrligine joldaǵan saýalynda.

Osyǵan oraı, depýtat Densaýlyq saqtaý mınıstrine jyl saıynǵy jalaqynyń ósýin, kommýnaldyq tólemderdiń, azyq-túliktiń, dári-dármektiń, basqa da qyzmetterdiń ınflıatsııasyn eskere otyryp, tarıfterdi qaıta qaraýdy, sondaı-aq jalaqysy az óńirlerge túzetý koeffıtsıentterin qoldanýdy usyndy.